Mazamure Maxaafaa 62 - Wolaytta Bible

Daawita mazamuriyaa

¹ Xoossaa xalaalan taani shemppuwaa demmaas; ta atotettai appe yees.

² A xalaalai ta wogga zaallaanne tana ashshiyaagaa; i taani qosetta attiyo soho gidiyo gishshau, mulekka yeeqikke.

³ Woddiya godanne qaaxxiya dirssanne milatiya asa woranau, intte aude gakkanaassi dendduuteetii?

⁴ Eti a bonchcho sohuwaappe a wottanaagaa xalaalaa koyoosona; eti wordduwan ufaittoosona. Bantta doonan anjjoosona; shin bantta wozanan qanggoosona.

⁵ Xoossaa xalaalan taani shemppuwaa demmaas; taani ufaissan naagiyoogee appe yees.

⁶ A xalaalai ta wogga zaallaanne tana ashshiyaagaa; i taani qosetta attiyo soho gidiyo gishshau, mulekka yeeqikke.

⁷ Ta atotettainne ta bonchchoi Xoossaana; i ta mino zaallaanne ta qatuwaa.

⁸ Asau, Xoossan ubba wode ammanettite; i nuuyyo qato gidiyo gishshau, intte metuwaa ayyo yootite.

⁹ Asi ubbi issiton shemppiyo carkko mala; xoqqin ziqqin, asi hada. Meezaanan wottinkka eti ainne deexxokkona; eti issiton shemppiyo carkkoppekka kauyyoosona.

¹⁰ Makkalan ammanettoppite; bonqqi shiishshidi duretanau halchchoppite. Intte duretettai darikkokka, intte wozanaa a bolli wottoppite.

¹¹ Xoossai hagaadan giyoogaa taani zaara zaarada siyaas; “Wolqqai Xoossaassa.

¹² Aggenna siiqoi Xoossaabaa” yaagiis. Abeet GODAU, neeni asa ubbaassi a oosuwaadan oosuwaadan qanxxana.