Mazamure Maxaafaa 61 - Wolaytta Bible

Daawiti xaafidoogaa

¹ Abeet Xoossau, neeni ta waasuwaa siya; ta woosaa ezgga.

² Taani ta sooppe kiyada haaho sohuwan de7ishin, ta wozanai taahido wode, taani nena xeesais. Taappe xoqqiya zaallaakko, tana kaaletta.

³ Aissi giikko, neeni taayyo qatonne taani ta morkketuppe naagettiyo mino miixaa.

⁴ Taani ne dunkkaaniyan merinaayyo de7arkkinaa! Taani ne qefiyaa haphaa giddon saro attarkkinaa!

⁵ Abeet Xoossau, neeni ta shiiquwaa siyadasa. Ne sunttaa yayyiyaageeti laattiyo laataa taayyo immadasa.

⁶ Kawuwaa bariyaa adussa; i yeletaappe yeletaa gakkanaassi de7o.

⁷ I Xoossaa sinttan merinau kawoto; aggenna ne siiquwaaninne ne tumatettan neeni a naaga.

⁸ Yaatiyaabaa gidikko, taani ta shiiquwaa gallassi gallassi gattaidda, ne sunttaa ubbaton sabbana.