Mazamure Maxaafaa 60 - Wolaytta Bible

Masphphexoomiyaaninne Sobaalan de7ida Sooriyaa asatuura olettido wodenne, Yoo7aabi guyye simmidi Maxine Dilbban tammanne naa77u sha7u asaa worido wode, Daawiti timirttiyaassi xaafido xalotiyaa

¹ Abeet Xoossau, neeni nuna aggadasa; nu miixaa menttadasa. Neeni nuna hanqqettadasa; shin ha77i nuukko simma.

² Neeni biittaa qaattadasanne za7issadasa; biittai kokkoriyo gishshau, neeni a za7uwaa bara.

³ Neeni ne asaa metuwaa bessadasa; neeni nuna ganddigaarissiya woiniyaa ushshadasa.

⁴ Neeyyo yayyiyaageeti bantta morkkiyaa wonddafiyaappe attana mala, malaataa immadasa.

⁵ Neeni siiqiyoogeeti attana mala, ne ushachcha kushiyan nuna ashsha; neeni nuussi alla.

⁶ Xoossai ba geeshsha sohuwan hagaadan yaagiis; “Taani xoonada Sekeema biittaa shaakkana; qassi Sukkota Dilbbaa likkana.

⁷ Gala7aadee taagaa; Minaaseekka taassa; Efireemi ta huuphiyaa ashshiya qophe; Yihudai ta kawotaa xam77aa.

⁸ Moo7aabi taani meecettiyo kuixaaro; Eedoomi taagaa gidiyoogaa erissanau ta caammaa a bolli wottais; Taani Pilisxxeema xoonada gereerais” yaagiis.

⁹ Gimbbettida katamaakko, tana oonee efaanai? Eedooma gakkanaassi tana oonee kaalettanai?

¹⁰ Abeet Xoossau, nuna aggidai nena gidikkii? Abeet Xoossau, neeni nu tooranchchatuura olau kiyakka.

¹¹ Asa maadoi pattenna gishshau, morkkiyaara olettanau neeni nuna maadda.

¹² Xoossaa wolqqan nu morkketa nuuni xoonana; nu morkketa yedhdhanai a.