Mazamure Maxaafaa 6 - Wolaytta Bible

Daawita mazamuriyaa

¹ Abeet GODAU, ne hanqquwan tana seeropparkkii; woikko ne yiilluwan tana qaxxayopparkkii.

² Abeet GODAU, taani labbannido gishshau, tana maararkkii. Abeet GODAU, ta meqettati tana sahuwan woriyo gishshau, tana patta.

³ Ta shemppiyaa daroppe un77ettaasu; shin GODAU, tana maaddanau neeni aude gakkanaassi gam77uutee?

⁴ Abeet GODAU, neeni simmada, tana ashsha; ne siiquwaa daruwan tana kessa ekka.

⁵ Haiqqida uri ooninne nena hassayenna; duufon nena galatiyai baawa.

⁶ Taani ooliyan daafuraas; qamma ubban taani yeekkaidda, ta hiixaa irxxissaas; ta borkkotaakka ta afuttan musissaas.

⁷ Ta morkketu ubbaa gaasuwan taani afuxxido gishshau, ta aifee galjjiis; ta aifee demmennan ixxiis.

⁸ GODAI taani yeekkiyo yeehuwaa siyido gishshau, inttenoo, iitaa oottiya ubbatoo, taappe shaahettite.

⁹ GODAI ta watiwatuwaa siyiis; GODAI ta woosaanne siyees.

¹⁰ Ta morkke ubbati yeellatonanne tuggatona. Eti issi kuttan yeellatidi, guyye simmona.