Mazamure Maxaafaa 59 - Wolaytta Bible

Daawita woranau a keettaa naagana mala Saa7ooli asata kiitti simmin Daawita xalotiyaa

¹ Abeet ta Xoossau, ta morkketuppe tana ashsha; ta bolli denddiyaageetuppe tana naaga.

² Iita oottiyaageetuppe tana ashsha ekka; suuttaa gussiya asatuppe tana ashsha.

³ Abeet GODAU, eti tana woranau zuggidi naagiyoogaa be7a! He wolqqaama iita asati ta bolli yaa7oosona. Abeet GODAU, ta mooruwaa gishshau woikko ta nagaraa gishshau gidenna.

⁴ Eti tana olanau wottaa jaamiyoogee, ta balaa gishshaassa gidenna. Beegotta, taakko haa yaada be7a.

⁵ Abeet Ubbaappe Wolqqaama GODAU Xoossau, Israa7eela Xoossau, kawotettata ubbaa pirddanau beegotta; makkalaa oottiyaageeta maaroppa.

⁶ Eti omarssan simmoosona; kanatudan bocciiddi, katama giddon yuuyoosona.

⁷ Hekko, eti bantta doonan haasayidi salokkona; eta inxxarssai bisuwaa mala. Eti biron, “Ooninne siyenna” giidi qoppoosona.

⁸ SHin abeet GODAU, neeni eta bolli miiccaasa; kawotettatu ubbaa bolli qilliiccaasa.

⁹ Xoossau, neeni taayyo qosetta attiyo soho gidiyo gishshau, taani ne wolqqan ammanettais.

¹⁰ Ta Xoossai aggenna ba siiquwan taakko yaana; ta Xoossai ta morkketa xooniyoogaa i tana bessana.

¹¹ Ta asati balirggenna mala, neeni eta woroppa. Abeet Godau, nu gonddalliyau, ne wolqqan eta toilayada ongga.

¹² Eti bantta doonaa nagaraa gishshaunne bantta inxxarssaa qaalaa gishshau, bantta otoruwan oiqqettona. Eta qanggettaa gishshaunne eti haasayiyo wordduwaa gishshau,

¹³ ne hanqquwan eta xaissa. Xoossai Yaaqooba zareta haariyoogaanne sa7aa gaxaa gakkanaassi de7iya biittaa haariyoogaa asai erana mala, eta mulekka attennaadan xaissa.

¹⁴ Ta morkketi omarssan simmoosona; kanatudan bocciiddi, katamaa giddon yuuyoosona.

¹⁵ Eti miyoobaa hasanau toilattoosona; kallana xayikko zuuzummoosona.

¹⁶ SHin taani ne wolqqaa sabbana; maallado aggenna ne siiquwaabaa yexxana. Aissi giikko, neeni taayyo ta waayiyaa gallassi, taani baqata attiyoosaanne qosetta attiyoosaa gidadasa.

¹⁷ Abeet taassi wolqqa gidida Xoossau, taani nena sabbana. Aissi giikko, taani qosetta attiyo sohoinne aggenna siiquwaa tana bessiya Xoossai nena.