Mazamure Maxaafaa 58 - Wolaytta Bible

Daawita xalotiyaa

¹ Inttenoo deriyaa haariyaageetoo, tumaappe likke haasayeetii? Asa ubbaa giddon xilluwaa pirdeetii?

² CHii, intte wozanan iitabaa halchcheeta; biittan intte kushee makkalabaa oottiis.

³ Iita asi aayee uluwaappe doommidi halees; yelettido gallassaappe doommidi, mooreesinne wordduwaa haasayees.

^4-5 Eti shooshshaadan yiishshaara de7oosona; eti wolqqaama eeqanchchai daadumatiyoogaa siyennaadan, ba haittaa tucciya tulle hasuwaa mala.

⁶ Abeet Xoossau, eta achchaa eta gappata giddon mentta; abeet GODAU, gaammotu kasilaa xukka.

⁷ Eti goggi xayiya haattaadan xayona. Eti bantta wonddafiyaa dukkiyo wode, zubbiyaa xeeran caddiya aifee xayo.

⁸ Eti maashidi saasso kiyiya xaadhdhiyaadan hanona; aayee uluwaappe boshettidi yelettida, poo7uwaa be7enna na7adan hanona.

⁹ Eti aguntta gididi daayanaappe kase, eti biron puutiyan de7ishin, i eta ba hanqquwan xaissana.

¹⁰ Haluwaa kessiyoogaa be7iyo wode, xilloti ufaittana. Iitatu suuttan bantta tohuwaa meecettana.

¹¹ He wode asai, “Tumakka xillotussi woitoi de7ees; tumakka sa7aa bolli pirddiya Xoossi de7ees” yaagana.