Mazamure Maxaafaa 57 - Wolaytta Bible

Gonggolo giddoppe Saa7oolappe baqatidi bi simmin Daawita xalotiyaa

¹ Tana maara; abeet Xoossau, tana maara; taani neekko baqatais. Taani bashshai aadhdhana gakkanaassi, ne qefiyaa giddo baqatada attais.

² Taani Ubbaappe Xoqqiya Xoossaassi, taassi ubbabaa oottiya Xoossaassi waassais.

³ Xoossai saluwaappe kiittidi, tana ashshana; tana yedhdhiyaageeta kaushshana; Xoossai aggenna ba siiquwaanne ba tumatettaa taayyo kiittana.

⁴ Taani ta morkketu giddon, asaa dafidi miya gaammo malatu giddon de7ais. Eta achchai tooraanne wonddafiyaa zubbiyaa mala; eta inxxarssai qara biso mala.

⁵ Abeet Xoossau, neeni salotuppe bollaara xoqqu xoqqu ga; ne bonchchoi sa7a ubbaa bollaara de7o.

⁶ Eti ta gediyaassi piriyaa wottidosona; taani metootada hokkaas. Eti ta ogiyan ollaa bookkidosona; shin he ollan banttau kunddidosona.

⁷ Ta wozanai minnidi de7ees; abeet Xoossau, ta wozanai minnidi de7ees. Taani neeyyo yexxananne nena sabbana.

⁸ Tanooshsho, beegotta! Diittaunne maazinqqiyau, beegottite! Taanikka maallado guuraara beegottana.

⁹ Abeet Godau, taani nena asaa giddon galatana; qassi kawotettaa giddon nena sabbana.

¹⁰ Aissi giikko, aggenna ne siiqoi gita; salota gakkiis. Ne tumatettaikka bolla shaaradan xoqqees.

¹¹ Abeet Xoossau, salotuppe bollaara xoqqu xoqqu ga! Ne bonchchoi sa7a ubbaa bolli gido.