Mazamure Maxaafaa 56 - Wolaytta Bible

Pilisxxeema asati a Gaate giyo kataman omooddido wode, Daawita xalotiyaa

¹ Abeet Xoossau, asati tana yedhdhiyo gishshaunne gallassa ubbankka ta morkketi tana qohido gishshau, taayyo qaretta.

² Ta morkketi gallassa ubban tana yedhdhoosona; daroti otoruwan tana oloosona.

³ Taani yayyido wode, nenan ammanettais.

⁴ Taani Xoossan ammanettais; taani a qaalaa galatiyo Xoossan ammanettaisinne yayyikke. Asi tana ai oottanee?

⁵ Gallassa ubban ta morkketi taayyo meto medhdhoosona; eti ubbaton taayyo iitabaa qoppoosona.

⁶ Eti ta bolli maqettoosona; zuggidi wochchoosonanne ta ogiyaa naagoosona; tana woranau koyoosona.

⁷ Eta iitatettaa gishshau, eta yeddoppa; ne hanqquwan he asata ziqqi ootta.

⁸ Neeni ta metoi woisaakko qoodadasa. Taani woisu afuttaa tigidaakko, neeni eraasa. Eti ne mazggafan de7okkonaa?

⁹ Taani nena xeesiyo wode, ta morkketi guyye simmana. Xoossai ta bagga gidiyoogaa taani erais.

¹⁰ Taani a qaalaa galatiyo Xoossan, taani a qaalaa galatiyo GODAN,

¹¹ taani he Xoossan ammanettais; yayyikke. Asi tana ai oottannee?

¹² Abeet Xoossau, taani neessi shiiqettidobaa oottana; hegaa galataa yarshshuwaa taani neeyyo immana.

¹³ Aissi giikko, neeni tana haiquwaappe, ta tohuwaa kunddettaappe ashshadasa. Hegaa gishshau, i paxa de7iyaageetu bollan poo7issiyo poo7uwan Xoossaa sinttan taani hemettais.