Mazamure Maxaafaa 54 - Wolaytta Bible

Ziifan de7iya asati Saa7oolakko biidi, “Daawiti nu biittan qosettiis” yaagidi yooti simmin Daawita timirttiyaa

¹ Abeet Xoossau, ne sunttan tana ashsha; ne wolqqan tana shatintta.

² Abeet Xoossau, ta woosaa siya; ta doonaa haasayaa ezgga.

³ Otoranchchati ta bolli denddoosona; daganttiya asati tana woranau koyoosona. Eti Xoossaa wudokkona.

⁴ Hekko Xoossai tana maaddiyaagaa; Godai tana zemppissiyaagaa.

⁵ Abeet Xoossau, ta morkketussi eta iitatettaa zaara. Neeni ammanettiyaagaa gidiyoogaadan eta xaissa.

⁶ Abeet GODAU, taani ta dosan neeyyo yarshshana; neeni keha gidiyo gishshau, taani ne sunttaa galatana.

⁷ Aissi giikko, neeni tana ta meto ubbaappe ashshadasa; ta morkketi xoonettiyoogaa ta aifiyan be7aas.