Mazamure Maxaafaa 52 - Wolaytta Bible

Eedooma biittaa asa gidiya Doiqi Saa7oolakko biidi, “Daawiti Abimeleka soo biis” yaagidi yooti simmin Daawita timirttiyaa.

¹ Nenoo, wolqqaama bitaniyau, Xoossaa asatu bolli iitabaa oottiyoogan, gallassa ubban aissi ceeqettai?

² Nenoo, worddobaa haniyaagoo, neeni harata xaissanau maqettaasa. Ne inxxarssai qara magilaalaa mala.

³ Neeni lo77uwaappe iitaa siiqaasa; qassi tumaa haasayiyoogaappe wordduwaa haasayiyoogaa dosaasa.

⁴ Nenoo, worddanchchau, neeni bochchiya qaalaa ubbaa siiqaasa.

⁵ SHin Xoossai nena merinau xaissana. I nena diippananne ne keettaappe dafidi kessana; i nena paxa de7iyaageetu giddoppe xoqollana.

⁶ Xilloti hagaa be7idi yayyana. Eti hagaadan yaagidi, ne bolli miiccana;

⁷ “Xoossaa baayyo qato oottibeenna, ba duretettaa daruwan ammanettida, iita oosuwan minnida bitaniyaa hagaa be7ite!” yaagana.

⁸ SHin taani Xoossaa keettan aaciya wogaraa mala. Aggenna a siiquwan taani meri merinau ammanettais.

⁹ Neeni oottido gishshau, taani nena merinau galatais. Taani Xoossaa asatu sinttan neeni keha gidiyoogaa yootana.