Mazamure Maxaafaa 51 - Wolaytta Bible

Berssaabiira sharamuxido hanotaa hananabaa yootiya Naataani ayyo yooti simmin Daawita mazamuriyaa

¹ Abeet Xoossau, aggenna ne siiquwaadan tana maara; ne qaretaa daruwaadan ta mooruwaa qucca.

² Ta iitatettaappe tana mule meecca; ta nagaraappe tana geeshsha.

³ Aissi giikko, ta mooruwaa taani erais; ta nagarai ubbatoo ta sinttaana.

⁴ Taani nena, ne xalaalaa naaqqadis; ne aifiyaa sinttan iitabaa oottaas. Hegaa gishshau, haasayaiddakka neeni likke; pirddaiddakka neeni xillo.

⁵ Taani yelettoosappekka tumu nagaranchcha; ta aayee uluwan biron attiyo wodeesappe doommadakka taani nagaranchcha.

⁶ Hekko neeni wozana giddo tumatettaa amottaasa; hegaa gishshau, ne aadhdhida eratettaa tana tamaarissa.

⁷ Hiisoophphe giyo bonccuwan neeni tana geeshsha; taani geeyana. Tana meecca; taani shachchaappe aadhdhada booxxana.

⁸ Neeni tana ufaissaanne hashshu giyoobaa sissa; neeni tana mentterettidabaa gidikkokka, zaarada ufaissa.

⁹ Ta nagaraappe ne sinttaa wora zaara; ta iitatettaa ubbaa qucca.

¹⁰ Abeet Xoossau, geeshsha wozanaa ta giddon medhdha; ammanettiya ayyaanaa ta giddon ooraxissa.

¹¹ Tana ne sinttaappe oloppa; ne Geeshsha Ayyaanaa taappe ekkoppa.

¹² Ne atotettaa ufaissaa taayyo zaarada imma; taani neeyyo eeno gaada azazettanaadan, tana zemppissa.

¹³ He wode taani mooranchchata ne ogiyaa tamaarissana; he nagaranchchatinne neekko simmana.

¹⁴ Abeet Xoossau, tana ashshiya Xoossau, suuttaa gussido nagaraappe tana ashsha; he wode ta inxxarssai ne xillotettaabaa yexxana.

¹⁵ Abeet Godau, ta doonaa dooya; yaatikko, ta inxxarssai ne galataa awaajjana.

¹⁶ Neeni yarshshuwan ufaittakka. Taani neeyyo xuuggiyo yarshshuwaa yarshshiyaakkokka, neeni ufaittakka.

¹⁷ Xoossaayyo yarshshiyo yarshshoi meqqida wozanaa; abeet Xoossau, “Nagara oottennan aggarkkinaashsha” giya, meqqida wozanaa neeni karakka.

¹⁸ Abeet Xoossau, ne dosan Xiyooneyyo keha; Yerusalaame gimbbeta gimbba.

¹⁹ He wode xillo yarshshuwan, xuuggiyo yarshshuwaaninne mehiyaa ashuwaa wurssi xuuggiyo yarshshuwan neeni ufaittana. Qassi korimati ne yarshshiyoosan yarshshettana.