Mazamure Maxaafaa 50 - Wolaytta Bible

Asaafa mazamuriyaa

¹ Wolqqaama GODAI, Xoossai haasayees. Awai mokkiyoosaappe wulliyoosaa gakkanaassi sa7an de7iya asaa xeesees.

² Merai kumetta lo77o gidiyo Xiyooneppe Xoossai poo7ees.

³ Nu Xoossai yaana; co77u geenna. Eexxiya tamai a sinttaana; wolqqaama gotee a yuushuwaana.

⁴ Xoossai ba asaa pirddiiddi, salotanne sa7aa markkau xeesees.

⁵ Xeesidi, “Yarshshuwaa yarshshiyoogan tanaara maachchaa maacettida Xoossaa asata taakko shiishshite” yaagiis.

⁶ Xoossai barkka pirddiyaagaa gidiyo gishshau, saloti a xillotettaa yootoosona.

⁷ “Ta asau, siya! Taani neeyyo yootais. Israa7eela asau, taani ne bolli markkattais. Taani Xoossaa, ne Xoossaa.

⁸ Ne yarshshuwaa gishshaunne neeni ubbaton shiishshiyo xuuggiyo yarshshuwaa gishshau, taani nena walassikke.

⁹ Hegaadankka, ne dirssaappe korimata, woikko ne birddiyaappe deeshshata ekkanau koyikke.

¹⁰ Aissi giikko, bazzon de7iya do7ati ubbati taageeta; sha7u keraa bollan de7iya mehetikka taageeta.

¹¹ Taani xoqqa deriyan de7iya kafota ubbaa erais; dembban de7iya meretettati taageeta.

¹² “Tana namisiyaakkonne, taani neeyyo yootikke: aissi giikko, sa7ainne sa7an kumidabai ubbai taagaa.

¹³ Taani korimatu ashuwaa miyanaayyee? Woikko deeshshatu suuttaa uyiyanaayyee?

¹⁴ Hegaa gishshau, Xoossaassi neeni immiyo yarshshoi galata gido; Ubbaappe Xoqqiya Xoossaassi ne shiiquwaa gatta.

¹⁵ Yaatada, metuwaa gallassi tana xeesa. Taani nena ashshana; neenikka tana bonchchana” yaagees.

¹⁶ SHin Xoossai iita asa hagaadan yaagees; “Ta higgiyaa neeni zaara zaarada aissi yootai? Woikko ta maachchaa ne doonan aibissi haasayai?

¹⁷ Neeni ta timirttiyaa ixxoohoo; ta qaalaakka haitta bollaara aattoohoo.

¹⁸ Neeni kaisuwaa be7ido wode, aara dabbotadasa; shaaramuxiyaageetu maabaran geladasa.

¹⁹ “Neeni ne doonaa iitabaa haasayanau birshsha yeddaasa. Ne inxxarssaikka wordduwaa haasayaa meezetiis.

²⁰ Ne uttidosan ne ishaa iissada haasayaasa; ne aayee na7aa zigiraasa.

²¹ Neeni hagaa ubbaa oottiyo wode, taani co77u giido gishshau, tanakka ne mala gaada qoppadasa. SHin ha77i taani nena walassaisinne ne balaa ne sinttan qoodais.

²² “Inttenoo, Xoossaa dogiyaageetoo, hagaa akeekite. Hegee xayikko, taani inttena mentterettana; he wode inttena ashshiyaabi baawa.

²³ Taayyo galataa immiya asi tana bonchchees. Ba ogiyaa sittissiya asa taani Xoossaa atotettaa bessana” yaagees.