Mazamure Maxaafaa 5 - Wolaytta Bible

Daawita mazamuriyaa

¹ Abeet GODAU, taani yootiyoogaa ezgga; ta ooliyaanne siya.

² Ta kawuwaunne ta Xoossau, tana maadda gaada taani waassiyo gishshau, ta woosaa waasuwaa siya.

³ Abeet GODAU, maallado maallado guuran neeni ta qaalaa siyaasa. Maallado maallado guuran taani ta woosaa ne sintti shiishshada, neeni taayyo immiyo zaaruwaa ekkana gaada naagais.

⁴ Neeni iitatettan ufaittenna Xoossaa; iitabi nenaara de7enna.

⁵ Ceeqettiyaageeti ne sinttan eqqokkona; iitabaa oottiya ubbata neeni ixxaasa.

⁶ Wordduwaa haasayiyaageetanne neeni xaissaasa. Suuttaa gussiyaageetanne cimmiya asata GODAI shenetees.

⁷ SHin taani ne siiquwaa daruwan ne keettaa gelana. Ne geeshsha Beeta Maqidasiyaakko, bonchcho yashshatettan goinnana.

⁸ Abeet GODAU, ta morkketu gishshaassi gaidda, tana ne xillotettan kaaletta; ne ogiyaa ta sinttan sittissa.

⁹ Eta doonaappe kiyiyaabi ammanttenna. Eta wozanankka genee kumiis; eta doonai dooyettida duufo mala; eti bantta inxxarssan cimmoosona.

¹⁰ Abeet Xoossau, eta neeni pirdda; eta kobai eta ekki bo. Eta nagarai daro gidido gishshau, neeni eta yedetta; aissi giikko, eti ne bolli makkalidosona.

¹¹ SHin neekko baqati qosetti attiya ubbai ufaittona; eti ubbaton ufaissan yexxona. Neenikka eta naagana; ne sunttaa siiqiya ubbati nenan keehi ufaittona.

¹² Aissi giikko, abeet GODAU, tumukka neeni xilluwaa anjjaasa. Neeni gonddallee kammiyoogaadan ne kehatettan a kammaasa.