Mazamure Maxaafaa 49 - Wolaytta Bible

Qoraaha naatu mazamuriyaa

¹ Inttenoo, asatoo, ubbatikka hagaa siyite. Inttenoo, sa7an de7iyaageetoo, ubbatikka hagaa ezggite.

² Xoqqai ziqqaikka, dure manqqoikka siyite.

³ Ta wozanaa qofai ciimma; ta doonai aadhdhida eratettaa haasayana.

⁴ Ta haittaa leemisuwaakko yeggana; diittaa diixxaidda, taani a birshshettaa qonccissana.

⁵ Meto wodiyan, ta iita morkketi tana dooddiyo wode, taani aissi yayyiyaanaa?

⁶ Ta morkketau, bantta aquwan ammanettiyaageetaunne bantta duretettaa daruwan ceeqqiyaageetau aissi yayyiyaanaa?

⁷ Ai asinne bana wozanau, woikko ba shemppuwaa waagaa Xoossau qanxxanau danddayenna.

^8-9 Aissi giikko, asa shemppo waagai al77o. Ai waagaa qanxxinkka, i merinau de7anaadan, woikko i haiqqennaadan oottanau gakkenna.

¹⁰ Eeyyatinne dammati haiqqiyoogaadan, aadhdhida eranchchatikka xayiyoogaanne bantta aquwaa haratussi yeggidi biyoogaa asai ubbai be7ees.

¹¹ Eti bantta biittaa banttabaa ginkka, duufoi merinau eta keettanne yeletaappe yeletaa gakkanaashin eti de7iyo soho gidana.

¹² Asi ai gitatikkokka paxa attenna; i do7adan haiqqana.

¹³ Banttarkka bantta huuphiyan ammanettiyaageetu qaadainne eta qaalaa tuma giyaageetu wurssettai hagaa.

¹⁴ SHuhau qorettida dorssatudan, eti duufuwau doorettidosona; haiqoi eta henttanchchaa gidana. Suureti maallado eta haarana; eti bantta yallisa keettaappe haakkidi, duufuwan musana.

¹⁵ SHin Xoossai tana wotti ekkana; i tana haiquwaa wolqqaappe ashshana.

¹⁶ Asi duretiyo wodenne, a aqotai dariyo wode yayyoppa.

¹⁷ Aissi giikko, i haiqqiiddi, ainne ekkidi beenna; a aqotai aara issippe duufuwaa beenna.

¹⁸ Asi paxa de7iyo wodiyan, “Taayyo kumiis” giikkonne, ubbabai assi giigido gishshau galatettikkonne,

¹⁹ simmidi poo7o be7enna ba maizza aawatun gaittees.

²⁰ Eri bainnan gitatida asi do7adan haiqqana.