Mazamure Maxaafaa 48 - Wolaytta Bible

Qoraaha naatu mazamuriyaa; yettaa

¹ GODAI gita. Nu Xoossaa kataman a geeshsha deriyan aaro galatai ayyo bessees.

² Xoossaa dere gidiya Xiyoonee xoqqanne lo77o. He gita kawuwaa katamai sa7a ubbaassi ufaissa.

³ He katamaa gimbbiyaa giddon, banan saro sohoi de7iyoogaa Xoossai bessiis.

⁴ Kawoti bantta tooranchchatuura issippe shiiqidosona; shiiqidi Xiyoone olanau yiidosona.

⁵ Yiidi a be7idi, garamettidinne dagammidi, guyye baqatidosona.

⁶ Eti hegan de7ishin, eta yashshaa kokkorssai oiqqiis; maaretai oiqqido maccaaseedan miixattidosona.

⁷ Arshsho bagga wolqqaama carkkuwan meqqiya Tarsseesa markkabiyaadan eti kokkoridosona.

⁸ Nuuni siyidoogaadankka, Ubbaappe Wolqqaama GODAA kataman, nu Xoossaa kataman, i oottidobaa be7ida. Xoossai he katamaa merinau mintti essees.

⁹ Abeet Xoossau, ne Beeta Maqidasiyaa giddon aggenna ne siiquwaa qoppida.

¹⁰ Abeet Xoossau, ne sunttaadankka ne galatai sa7aa gaxaa gakkiis. Ne ushachcha kushee xillo pirddan kumidaagaa.

¹¹ Ne pirddaa gishshau, Xiyoone asai ufaittees; Yihudaa moottatikka ufaittoosona.

¹² Xiyoone yuushuwan hemettite; i yuushuwan yaa haa simerettite. I miixaa qoodite.

¹³ Yiya yeletau yootanaadan, i gimbbiyaa akeekitenne i qatota xomoosite.

¹⁴ Intte, “Meri merinau ha Xoossai nu Xoossaa; i nuna merinaassi kaalettana” yaagidi yootite.