Mazamure Maxaafaa 47 - Wolaytta Bible

Qoraaha naatu mazamuriyaa

¹ Kawotettati ubbai intte kushiyaa baqqite; qaalaa xoqqu oottidi, Xoossaayyo galataa yexxite.

² Ubbaappe Xoqqiya GODAI yayettanau bessees; sa7a ubbaa bollan i gita kawo.

³ Dere asaa nuuppe garssaara, kawotettatakka nu gediyaappe garssaara wottidi, nuuyyo haarissees.

⁴ I nuuyyo laattiyo biittaa dooriis; he biittainne i siiqiyo dereti, Yaaqooba zareti ceeqettiyoogaa.

⁵ Xoossai pude kawotaa araataa kiyiis. GODAI pude kiyiyo wode, ufaissaa hombbocettainne malkkataa punettai siyettiis.

⁶ Xoossaa sabbite; ee, a sabbite. Nu kawuwaa sabbite; ee, a sabbite.

⁷ Xoossai sa7a ubbaa kawo gidiyo gishshau, galata sabaa sabbite.

⁸ Xoossai ba geeshsha kawotaa araatan uttidi, kawotettata haarees.

⁹ Kawotettatu halaqati Abrahaama Xoossaa asatuura issippe shiiqoosona. Aissi giikko, sa7an de7iya wolqqaamati ubbai Xoossaassa; i keehippe xoqqu giis.