Mazamure Maxaafaa 45 - Wolaytta Bible

Qoraaha naatu timirttiyaa, siiquwaa yettaa

¹ Taani ha yettaa kawuwaassi xaafiyo wode, ta wozanai lo77o qofaa pulttees; ta inxxarssai lo77o xaafiya asa biiriyaa mala.

² Asa ubbaappe neeni malanchcha; ne haasayai nashettiyaagaa. Hegan Xoossai nena merinaassi anjjiis.

³ Wolqqaama kawuwau, ne bisuwaa ne xeessan gixxa; bonchchoinne gitatettai nebaa.

⁴ Ne tumatettaa, ashkketettaanne xillotettaa gishshaa olettada xoonanau, ne gitatettaa bessaidda, piriixa. Ne ushachcha kushee maalaalissiyaabaa besso.

⁵ Ne zubbeti qara; eti ne morkketu wozana aifiyaa caddona. Kawotettati ne gediyan kunddona.

⁶ Abeet Xoossau, ne kawotaa araatai meri merinau de7ees; ne kawotaa xam77aikka suuretettaa xam77aa.

⁷ Neeni xillotettaa siiqaasa; naaquwaa ixxaasa. Xoossai, ne Xoossai, nena ne laggetuppekka aattidi, ufaissaa zaitiyaa tiyidoogee hegaassa.

⁸ Sinxxan, xaittaaninne puuxisan ne maayoi ubbai xaidettiis. Danggarssaa zaaliyan alleeqettida ne kawotaa keettan diixxiyaageeti nena ufaissoosona.

⁹ Kawuwaa keettan de7iya maccaasatu giddon kawotu macca naati de7oosona; kawiyaa geeshsha worqqan alleeqettada neeppe ushachcha baggan eqqaasu.

¹⁰ Ta na7ee, siya; ezgga; ne haittaa haa yegga. Ne zariyaanne ne aawaa keettaa doga.

¹¹ Ne meraa kawoi amottees; i neessi goda gidiyo gishshau, assi azazetta.

¹² Xiiroosa biittaa asai neessi woituwaa ekkidi yaana; dureti nena auddashana.

¹³ Kawoi ekkiyo na7iyaa kawo keettaa giddon aiba lo77ai! I bullachchaa maayoikka worqqa qacinan dadettiis.

¹⁴ Ba alleeqo maayuwaa maayada, kawuwaakko moisettausu; i lagge naati geela7oti, o ajabidi, a sintti aadhdhoosona.

¹⁵ Eti ufaittiiddinne hombbociiddi yiidi, kawuwaa keettaa geloosona.

¹⁶ Kawuwau, ne aawatu sohuwaa ne naati ekkana. Neeni eta biitta ubbaa bollan sunttana.

¹⁷ Taani ne sunttai yeleta ubban hassayettanaadan oottana. Hegaa gishshau, asai meri merinau nena galatana.