Mazamure Maxaafaa 44 - Wolaytta Bible

Qoraaha naatu timirttiyaa

¹ Abeet Xoossau, aadhdhida wodiyan, beni nu aawatu wodiyan, neeni oottidobaa nuuni nu haittan siyida; nu aawatikka nuuyyo yootidosona.

² Kawotettata neeni ne kushiyan laaggada kessadasa; nu aawata eta biittan tokkadasa; hara kawotettaa qaxxayadasa; shin ne dereta dureyadasa.

³ Eti bantta bisuwan olidi, he biittaa kessibookkona; eti bantta kushiyaa minotettan xoonibookkona. SHin neeni eta siiqido gishshau, eti ne ushachcha kushiyaa, ne qesiyaanne ne sinttaa poo7uwaa wolqqan xoonidosona.

⁴ Yaaqooba asau xoonota azaziya ta kawoinne ta Xoossai nena.

⁵ Nenan gididi, nu morkketa nuuni sugi olana; ne sunttan nu ixota nuuni yedhdhana.

⁶ Taani ta tooran ammanettikke; ta bisoikka tana ashshenna.

⁷ SHin neeni nuna nu morkketuppe ashshadasa; qassi nuna ixxiyaageeta neeni kaushshadasa.

⁸ Nuuni ubba wode Xoossan ceeqettoos; ne sunttaassi merinau galataa immana.

⁹ SHin ha77i neeni nuna aggadasa; kaushshadasa; nu tooraasaara issippe olaa baakka.

¹⁰ Nu morkketu sinttaappe nuna baqatissadasa; nu morkketi nubaa bonqqidosona.

¹¹ Neeni nuna dorssatudan shuhau aattada immadasa; qassi kawotettatu giddon nuna laaladasa.

¹² Neeni ne asaa hiraisuwan baizzadasa; aiba worenne demma be7akka.

¹³ Neeni nuna nu shooroti boriyoobaanne, qassi nu heeran de7iyaageeti qilliicciyoobaanne miicciyoobaa oottadasa.

¹⁴ Neeni nuna kawotettata giddon haise kessadasa; nuna eti bantta huuphiyaa qaatti qaatti qiriyoobaa oottadasa.

^15-16 Taani gallassa kumettan tooshettaidda de7ais; tana cayiyaageetunne boriyaageetu gaasuwan, tana morkkiyaageetunne manddiyaageetu gaasuwan, tana yeellai kammiis.

¹⁷ Nuuni nena dogibeennabaa gidikkokka, woikko ne maachchaa kanttibeennabaa gidikkokka, hagee ubbai nu bollan haniis.

¹⁸ Nu wozanai neeppe guyye simmibeenna; nu tohoi ne ogiyaappe gaxi kiyibeenna.

¹⁹ SHin neeni nuna mentterettada do7a giddon yeggadasa; sakkana xuman kammadasa.

^20-21 Wozanan geemmida xuuraa Xoossai eriyo gishshau, nu Xoossaa sunttaa nuuni dogidaakko, hara xoossaa woossanau nuuni nu kushiyaa miccidaakko, i hagaa qoridi demmennee?

²² SHin ne gishshau, gallassa ubban nuna woroosona; goora7anau efiyo dorssadan qoodettida.

²³ Abeet Godau, dendda! Aissi xiskkai? Beegotta! Merinaassi nuna aggoppa.

²⁴ Ne som77uwaa nuuppe aissi genttai? Nu qohuwaanne nu un77uwaa aissi dogai?

²⁵ Nuuni baanan duge olettida; nu bollaikka biittaara oiqettiis.

²⁶ Abeet Godau, dendda! Nuna maadda! Aggenna ne siiquwaa gishshau, nuna woza.