Mazamure Maxaafaa 42 - Wolaytta Bible

Qoraaha naatu timirttiyaa

¹ Gaarai goggiya haattaa laamotiyoogaadan, abeet Xoossau, hegaadan taanikka nena laamotais.

² “Taani baada, Xoossaa sinttaa be7anai audeeshsha?” gaada, Xoossaa, de7o Xoossaa saamettais.

³ Asati ubbatoo, “Ne Xoossai awan de7ii?” yaagiyo wode, taayyo gallassinne qammi ta afuttai quma gidiis.

⁴ Taani eta baalaa bonchchanau shiiqida daro asaa giddoora salppiyan hombbocishiininne galata yettaa yexxishin, Xoossaa keetti kaalettidoogaa qoppiyo wode, ta wozanai azzanidi, giddon seerees.

⁵ Tanooshsho, taani aissi azzaniyaanaa? Qassi aissi jabbukettiyaanaa? Taani Xoossan ufaissaa wottana. Aissi giikko, taani ha77ikka tana ashshiyaagaanne ta Xoossaa galatana.

⁶ Ta wozanai azzaniis; hegaa gishshau, taani Yorddaanoosa biittan, Hermmoone xoqqan, Miizaare Deriyan eqqada nena hassayais.

⁷ Ne soossuwaa gunttan ciimmai ciimmau alaahees; qassi ne beetainne ne hobbee ubbai ta bollaara goggiis.

⁸ Gallassi GODAI aggenna ba siiquwaa taayyo kiittees. Qammikka a yettai tanaara de7ees; he yettaikka taani taayyo de7uwaa immiya Xoossaa woossiyo woosaa.

⁹ Xoossaa, ta wogga zaallaa taani, “Aissi tana dogadii? Taani aissi ta morkkiyan naaqettada azzanaidda hemettoo?” yaagais.

¹⁰ Ta morkketi tana, “Ne Xoossai awan de7ii?” yaagi yaagidi, ta meqettaa menttidi cayoosona.

¹¹ Tanooshsho, taani aissi azzaniyaanaa? Qassi aissi jabbukettiyaanaa? Taani Xoossan ufaissaa wottana. Aissi giikko, taani ha77ikka tana ashshiyaagaanne ta Xoossaa galatana.