Mazamure Maxaafaa 41 - Wolaytta Bible

Daawita mazamuriyaa

¹ Hiyyeesaayyo qoppiya asi anjjettidaagaa; metuwaa gallassi GODAI a ashshees.

² GODAI a naagidi, paxa wottees. Inne biittaa bollan anjjettidaagaa gidees; GODAI a a morkketu amuwaayyo aattidi immenna.

³ GODAI a harggiyaa hiittan de7ishinkka maaddees; i sahettinkka, a pattees.

⁴ Tana gidikko, taani, “Abeet GODAU, taani nena naaqqido gishshau, tana maara; harggiyaappenne tana patta” yaagaas.

⁵ Ta morkketi iitaban tana haasayiiddi, “I aude haiqqanddeeshsha? Qassi a sunttaikka aude xayanddeeshsha?” yaagoosona.

⁶ Tana be7anau yiya ooninne taayyo worddobaa yootees; ba wozanan tana zigiriyoobaa qorees. Hegaappe guyyiyan, kare kiyidi, yan han oduwaa laalees.

⁷ Tana ixxiya ubbati issippe ta bollan saasukkoosona; “Iitabai a bolli gakkees” giidi qoppoosona.

⁸ Qoppidi, “A iita harggee oiqqiis; i he zin77idosaappe mulekka denddenna” yaagoosona.

⁹ Harai attin, taani ammanettiyo ta siiqo laggee, taani barssidoogee ta kushiyaa saxxiis.

¹⁰ SHin abeet GODAU, neeni tana maara; taani eta kushiyaa kessanaadan, tana harggiyaa hiittaappe dentta.

¹¹ Neeni tanan ufaittidoogaa taani erais; aissi giikko, ta morkkee tana xoonibeennanne ta bolli gairibeenna.

¹² Neeni tana ta suuretettaa gishshau kaafadasa; ne sinttan tana merinau wottadasa.

¹³ GODAI, Israa7eela Xoossai, merinaappe merinaa gakkanau galatetto. Amin77i. Amin77i.