Mazamure Maxaafaa 40 - Wolaytta Bible

Daawita mazamuriyaa

¹ Taani GODAA danddayan naagaas; i taakko simmidi, ta waasuwaa siyiis.

² Bashsha ollaappe, liqimisiyaa urqqaappe tana kessiis. Ta gediyaa shuchchaa bollan essiis; qassi ta ogiyaakka saro oottiis.

³ I ta doonan ooratta yettaa wottiis; he yettainne, “Nu Xoossai galatetto” yaagiyaagaa. Daroti be7idi, yayyananne GODAN ammanettana.

⁴ GODAA bau ammanettiyoobaa oottida asi, otoranchchatukkonne worddo xoossatussi goinniyaageetukko simmenna asi anjjettidaagaa.

⁵ Abeet GODAU, ta Xoossau, neeni daro maalaalissiyaabaa oottadasa; nenaara likkettiyai ooninne baawa! Neeni nuuyyo qoppido lo77o qofaa ooninne qoodanau danddayenna. Hegee taani yootin, wuriyaabaa gidenna.

⁶ Neeni yarshshonne imo koyabaakka; shin siyana mala, taayyo haittaa dooyadasa. Xuuggiyo yarshshuwaanne nagaraa yarshshuwaa neeni koyabaakka.

⁷ Hegaappe guyyiyan taani, “Xaatta maxaafan tabai xaafettidoogaadan, taani yaas.

⁸ Abeet ta Xoossau, taani neeni koyiyoogaa oottanau dosais; ne higgee ta wozanaa giddon de7ees” yaagaas.

⁹ Kunttida yaa7an taani, “GODAI nuna ashshees” yaagada, mishiraachchuwaa yootaas. Abeet GODAU, neeni eriyoogaadankka, taani ta doonan yootiyoogaa aggikke.

¹⁰ Taani ne xillotettaa ta wozanaa giddon qosabeikke; neeni ammanettiyoogaanne ashshiyoogaa yootaas. Qassi aggenna ne siiquwaanne ne tumatettaa ne kunttida yaa7aappe genttabeikke.

¹¹ Abeet GODAU, ne maarotettaa taappe haassoppa. Aggenna ne siiqoinne ne tumatettai tana ubba wode naago.

¹² Aissi giikko, qoodi bainna iitabai tana dooddiis. Ta iitatettai tana gakkidi gooziis; taani xeellanau danddayikke. Ta iita oosoi ta huuphiyaa binnaanaappe dariis; ta wozanai ta giddon seeriis.

¹³ Abeet GODAU, tana ashshanau eeno ga; abeet GODAU, tana maaddanau eesota.

¹⁴ Tana woranau koyiyaageeti mulekka yeellatonanne kauyyona. Taani qohettanaagaa amottiyaageeti kauyyidi guyye simmona.

¹⁵ Ta bolli, “Au hashshu! Hashshu!” giidaageeti xoonettido gishshau, yeellatona.

¹⁶ SHin nena koyiya ubbati nenan ufaittonanne hashshu goona. Qassi ne atotettaa dosiyaageeti ubbati, “GODAI gitato!” yaagona.

¹⁷ Taani hiyyeesanne metootanchcha; tabaa Godai qoppo. Tana maaddiyainne ashshiyai nena; abeet ta Xoossau, gam77oppa.