Mazamure Maxaafaa 39 - Wolaytta Bible

Daawita mazamuriyaa

¹ Taani, “Ta inxxarssan nagara oottennaadan, ta ogiyaa naagana. Iita asati ta sinttan de7iyo wode, ta doonaa barana” yaagaas.

² SHin taani duudedan co77u gaas; taani harai atto lo77obaa haasayiyoogaara agginkka, ta waayee yaa dariis.

³ Taani hirggaas; taani qofan sheekkidaashin, ta qofai poddu giidi, eexxi kiyiis. Yaatin, ta inxxarssan hagaadan yaagaas;

⁴ “Abeet GODAU, ta de7uwaa wurssettaanne taayyo de7anau attida gallassaa tana bessa. Qassi ta de7oi ciranau ai keenaa eesotiyaakko, tana erissa.

⁵ Neeni ta laittaa qii takkaaro kessadasa. Ta baree ne sinttan bainnabaa mala; tumaappe asi ubbi issiton shemppiyo carkko mala.

⁶ Tumaappe asai eeshuwaadan hemettees; tumaappe coo mela simerettees. I aquwaa shiishshees; shin ekkana asa erenna.

⁷ “Abeet Godau, ha77i simmi, taani naagiyoobai aibee? Taani ufaissaa oottiyoi nenaana.

⁸ Ta mooro ubbaappe tana ashsha; eeyyatan tana toochissoppa.

⁹ Hagaa ubbaa oottidaagee nena gidiyo gishshau, taani duudaas; doonanne pogabeikke.

¹⁰ Ne boshaa ta bollaappe dentta. Ne kushiyaa minotettaa gaasuwan taani hitais.

¹¹ Neeni asa a nagaraa gishshau, seeraasanne qaxxayaasa; a al77obaakka bil77aadan wurssaasa. Tumaappe asi ubbi issiton shemppiyo carkko mala.

¹² “Abeet GODAU, ta woosaa siya; tana maaddanau ta waasuwaa ezgga. Ta afuttaa co77u gooppa; aissi giikko, taani ta aawatu ubbaadan betenne imatta gidada, nenaara de7ais.

¹³ Taani shaahettanaappenne xayanaappe kasetada ufaittana mala, hai tana agga” yaagaas.