Mazamure Maxaafaa 38 - Wolaytta Bible

Daawita mazamuriyaa, hassayissiyaabaa

¹ Abeet GODAU, ne hanqquwan tana godatoppa; ne yiilluwan tana qaxxayoppa.

² Ne wonddafiyaa zubbeti tana caddirggidosona; ne kusheekka tana naaqqi oiqqiis.

³ Neeni lanccido gishshau, ta bollai payyenna; ta nagaraa gishshau, ta asatettai sarenna.

⁴ Ta iitatettai di7uwaadan tana muukkiis; denddenna gita toohuwaadan taayyo deexxees.

⁵ Taani nagaraa oottido eeyyatettaa gishshau, ta mazunttai giishshaa oittidi xinqqiis.

⁶ Ta harggiyaa gaasuwan taani hokkaasinne quunnaas. Gallassa kumettaa yeekkaidda pe7aas.

⁷ Tana mishoi xuuggees; ta bollai payyenna.

⁸ Taani hitaasinne nippi gaas; taani tuggatada oolais.

⁹ Abeet Godau, ta amo ubbai neeyyo erettees; taani ooliyoogee neeppe geemmibeenna.

¹⁰ Ta wozana aifiyan diddiqees; ta wolqqai hitiis; ta aifiyaappe payyatettai kichchiis.

¹¹ Ta mazunttaa gishshau, ta shoorotikka ta laggetikka haahuwan eqqidosona. Ta dabbotikka taappe haakkidosona.

¹² Tana woranau koyiyaageeti bantta piriyaa taayyo yeggoosona. Tana qohanau koyiyaageeti, “Nangga; nuuni nena demmana” yaagidi, manddoosonanne gallassa kumettaa ta bolli yaa7oosona.

¹³ He wode taani tulle asa mala, siyikke; taani duude asa mala, doonanne pogikke.

¹⁴ Ee, taani siyennanne doonai zaarenna asa mala.

¹⁵ SHin abeet GODAU, taani nenan ufaissaa oottais. Abeet Godau, ta Xoossau, neeni taayyo zaaruwaa immana.

¹⁶ Taani GODAA, “Ta gedee xubettin, eti, 'Ayyo hashshu' gaanaadaaninne ta bolli ceeqettanaadan oottoppa” yaagais.

¹⁷ Taani kunddana hanais; ta sahoinne tana yeddennan ixxiis.

¹⁸ Taani ta iita oosuwaa paaxais; taani ta nagaraa gaasuwan azzanais.

¹⁹ Ta morkketi goobanne wolqqaama; tana coo ixxiyaageeti cora.

²⁰ Taani lo77obaa oottin, taayyo iitaa zaariya asati, taani lo77obaa kaalliyo gishshau, tana ixxoosona.

²¹ Abeet GODAU, tana yeggoppa. Abeet ta Xoossau, taappe neeni haakkoppa.

²² Abeet Godau, tana ashshiyaagoo, tana maaddanau ellella.