Mazamure Maxaafaa 37 - Wolaytta Bible

Daawiti xaafidoogaa

¹ Iitaa oottiyaageetu gishshau yiillotoppa. Nagaraa oottiyaageeta annaacoppa.

² Aissi giikko, eti maataadan eesuwan melana; shullida bonccuwaadan eti haiqqana.

³ Neeni GODAN ammanetta; lo77obaa ootta. Yaatada biittan saro de7a.

⁴ GODAN ufaitta; i neeyyo ne wozanaa amuwaa immana.

⁵ Ne ogiyaa hadaraa GODAAYYO imma. An ammanetta; i neessi oottana.

⁶ I ne shatinttaa maallado xalqqiyaadan, qassi ne yohuwaa pirddaa gallassa seetaa awaadan poo7issana.

⁷ GODAA sinttan co77u gaada, i oottanaashin, danddayan naaga. Eta iita halchchoi polettin, duretida asatu bolli yiillotoppa.

⁸ Hanqquwaa agga; yiilluwaappe teqetta. Yiillotoppa; aissi giikko, hegee metuwan yeggees.

⁹ Iitaa oottiyaageeti xoqollettidi xayana; shin GODAN ufaissaa oottiyaageeti biittaa laattana.

¹⁰ Iitaa oottiyaageeti guutta wodiyaappe guyyiyan de7okkona; neeni eta koyiyaakkokka eti beettokkona.

¹¹ SHin ashkketi biittaa laattana; eti sarotettaaninne duretettaani ufaittidi daana.

¹² Iita asi xillo asa bolli maqetteesinne ba achchaa garccees.

¹³ SHin Godai iitatu bollan miiccees; aissi giikko, eta gallassai yiyoogaa i erees.

¹⁴ Iita asati hiyyeesatanne metootanchchata ongganaunne suuretettan hemettiyaageeta woranau, bantta bisuwaa shoddidosonanne bantta wonddafiyaa dafidosona.

¹⁵ SHin eta bisoi eta wozana aifiyan gelana; eta wonddafeekka meqqana.

¹⁶ Xilluwaassi de7iya guuttabai cora iita asatussi de7iya darobaappe lo77o.

¹⁷ Aissi giikko, iitatu wolqqai meqqana; shin xillota GODAI zemppissees.

¹⁸ Suure asatu ogiyaa GODAI erees; eta laataikka merinau etabaa gidana.

¹⁹ Iita wodiyan suure asati yeellatokkona; koshaa wodiyan eti kallana.

²⁰ SHin iita asati haiqqana. GODAA morkketi gam77enna dembbaa ciishshaa mala; eti cuwaadan xayana.

²¹ Iita asi tal77i ekkidi qanxxenna; shin xillo asi qarettidi immees.

²² GODAN anjjettidaageeti biittaa laattana; shin qanggettidaageeti xoqolletti xayana.

²³ Asai baanau bessiya ogiyaa GODAI kaalettees. I bana ufaissiya asata minttees.

²⁴ Eti xubettikkokka kunddokkona; aissi giikko, GODAI eta kushiyaa oiqqidi kaafees.

²⁵ Taani kase yelaga; ha77i simmi cimaas; shin xillo asi coo attin, woikko a naati miyoobaa woossin, taani mulekka be7a erikke.

²⁶ I ubba wodekka keha; coo tal77ees. A zaretikka anjjo gidana.

²⁷ Iitaappe haakka; lo77obaa ootta. Yaatikko, ne zerettai biittan merinau de7ana.

²⁸ Aissi giikko, GODAI xillobaa dosees. Xoossaa asata i yeggenna; xilloti merinau naagettoosona. SHin iitatu zerettai xoqollettana.

²⁹ Xilloti biittaa laattananne yan merinau de7ana.

³⁰ Xilluwaa doonai aadhdhida eraa yootees; a inxxarssaikka xillobaa haasayees.

³¹ A Xoossaa higgee a wozanan de7ees; a tohoikka appe harchchenna.

³² Iita asi xillo asa wochcheesinne woranau koyees.

³³ SHin GODAI xillo asa a kushiyan yeggenna; pirddau eqqiyo wodekka a bolli pirddissenna.

³⁴ GODAN ufaissaa wottada, a ogiyaa naaga. Neeni biittaa laattana mala, i nena gitayana. Iita asati xoqollettidi xayishin, neeni be7ana.

³⁵ Taani issi wode issi daganttiya iita bitaniyaa, woladan daayidaagaa be7aas.

³⁶ SHin taani he sohuwaara simmada kanttiyo wode i xayiis; koyinkka i beettibeenna.

³⁷ Ane lo77o asa akeeka; suure asa be7a; aissi giikko, saro asaassi sintta yeletai de7ana.

³⁸ SHin mooranchchati mule xayana; iitatu yeletaikka xoqolletti xayana.

³⁹ Xillotu atotettai GODAAPPE yees; metuwaa wode i etayyo naagetti attiyo soho.

⁴⁰ GODAI xillota maaddeesinne ashshees. Eti akko baqatido gishshau, i eta iitatuppe wotti ekkeesinne ashshees.