Mazamure Maxaafaa 35 - Wolaytta Bible

Daawiti xaafidoogaa

¹ Abeet GODAU, tanaara eqettiyaageetuura neeni eqetta; tanaara olettiyaageetuura neeni oletta.

² Gonddalliyaanne hara ola miishshaa oiqqada, tana maaddanau dendda.

³ Tana yedettiyaageetu bollan ne tooraanne mashshaa dentta. Tana, “Aikkobaa; taani nena ashshiyaagaa” yaaga.

⁴ Ta shemppiyo woranau koyiyaageeti yeellatonanne kauyyona; ta bolli iitabaa maqettiyaageeti kauyyidi guyye simmona.

⁵ GODAA kiitanchchai eta yedettiyo wode, eti carkkuwaa sinttan de7iya suullaadan hanona.

⁶ GODAA kiitanchchai eta dechchana haniyo wode, eta ogee xumanne hallitta gido.

⁷ Coo tana oiqqanau bantta piriyaa wottidosona; qassikka coo tana oogganau ollaa bookkidosona.

⁸ Erennan de7ishin, eta bollan bashshai puttu go. Eti wottido piree eta oiqqo; eti bashshan kunddona.

⁹ He wode taani GODAN ufaittana; i ashshido gishshau, taani ufaissaa poocu gaana.

¹⁰ Ta kumetta asatettai nena, “Abeet GODAU, ne mali oonee? Hiyyeesaa wolqqaamaa kushiyaappe wotta ekkaasa. Hiyyeesaanne metootanchchaa bonqqi miyaageetu kushiyaappe ashshaasa” yaagana.

¹¹ Wordduwaa markkattiyaageeti ta bolli denddoosona. Taani erennaban tana mootoosona.

¹² Taani lo77o oottidoogaa kushiyaa iitaa zaaroosona; yaatin, taani azzanais.

^13-14 SHin taani eti harggido wode, waaruwaa maayaas; ta asatettaa xooman daafurssaas. Ta huuphiyaa ziqqi oottada, ta dabbossi woikko ta ishassi woossiyoogaadan woossaas. Issi asi ba aayeessi kayyottiyoogaadan ta huuphiyaa ziqqissada, yeekkaidda hemettaas.

¹⁵ SHin eti taani xubettidoogan ufaittidi, ta bolli shiiqidosona. Taani erenna asati tana wadhdhidi, aguwaa ixxidosona.

¹⁶ Eti wobbiyaa asa baceessiyaabaadan tana baceessoosona; eti yiillotidi, bantta achchaa garccidosona.

¹⁷ Abeet Godau, neeni aude gakkanaassi co77u gaada xeelluutee? Eta iita oosuwaappe tana ashsha; ha gaammotu mala asatuppe tana wotta ekka.

¹⁸ He wode kunttida yaa7an taani neeyyo galataa immana; cora asaa shiiquwan taani nena galatana.

¹⁹ Wordduwan tana morkkiyaageeti ufaittoppona; tana coo ixxiyaageeti ta bolli qim77otoppona.

²⁰ Eti sarobaa haasayiyoogaa aggidi, biittan co77u giidi de7iya asatu bollan wordduwaa medhdhidi haasayoosona.

²¹ Eti bantta inxxarssaa ta bolli qarayidi, “Ee, ee, neeni oottidoogaa nuuni nu aifiyan be7ida” yaagoosona.

²² Abeet GODAU, neeni hagaa be7adasa; co77u gooppa. Abeet Godau, neeni taappe haakkoppa.

²³ Abeet ta Xoossau, ta Godau, ta gishshaa dendda; ta doona gidada mootetta.

²⁴ Abeet GODAU, ta Xoossau, ne xillotettan tana shatintta; ta morkketa ufaissoppa.

²⁵ Eti banttau, “Hashshu, hashshu, nuuni nu wozanan amottidoogaa gattida. Nuuni a mittida” gaanaadan oottoppa.

²⁶ Ta waayiyan ufaittiyaageeti mule yeellatonanne kauyyona. Ta bollan otorettiyaageeti yeellaanne kaushshaa maayona.

²⁷ Taani shatimmiyoogaa dosiyaageeti ufaittidi, “Hashshu!” goosona. Eti ubbatoo, “Ba ashkkaraa sarotettan ufaittiya GODAI gitato” yaagona.

²⁸ Gallassa kumettan ta inxxarssai ne xillotettaabaanne ne galataabaa yootana.