Mazamure Maxaafaa 34 - Wolaytta Bible

Bana gooddida Abimeleka sinttappe gooyyiyaabaa milatidi biido wode, Daawita mazamuriyaa

¹ Taani GODAA ubba wode galatana; a galatai ai wodenne ta doonaappe paccenna.

² Taani GODAN ceeqettais; naaqettidaageeti hegaa siyidi ufaittona.

³ Tanaara gididi, GODAA gitayite. Ane issippe a sunttaa xoqqu xoqqu oottoos.

⁴ Taani GODAA koyaas; koyin i taayyo zaariis; taani yayyiyoobaa ubbaappe tana i ashshiis.

⁵ Naaqettidaageeti akko xeellidi ufaittoosona; eta som77oi mulekka yeellatenna.

⁶ Ha hiyyeesa bitanee waassiis; waassin GODAI a waasuwaa siyiis; a metuwaa ubbaappe a ashshiis.

⁷ GODAA kiitanchchai GODAASSI yayyiya asata naagees; i eta yuushuwan gididi, eta ashshees.

⁸ GODAI keha gidiyoogaa xeelli be7ite. Akko baqatiya asi anjjettidaagaa.

⁹ Inttenoo, a geeshsha asatoo, GODAAYYO yayyite; aissi giikko, ayyo yayyiya ubbatuyyo aibinne paccenna.

¹⁰ Gaammotikka miyoobai xayin namisettoosona; shin GODAA koyiyaageetau lo77obi aibinne paccenna.

¹¹ Ta tamaaretoo, haa yiite; siyite; GODAA yashshaa taani inttena tamaarissana.

¹² Lo77o de7uwaa de7anaunne kehabaa be7ana mala, ba baree aduqqanau koyiya asi waanida asee?

¹³ Ne inxxarssai iitabaa haasayennaadan, ne doonaikka wordduwaa odennaadan teqqa.

¹⁴ Iitaappe shaahetta; lo77obaa ootta; sarotettaa keehi koyada kaalla.

¹⁵ GODAA aifee xillotukko xeellees; qassi i ubba wode eta waasuwaa ezggees.

¹⁶ Eta hassayissiyaabaa biittaappe xaissana mala, GODAI iitaa oottiyaageeta ba hanqqo som77uwan xeellees.

¹⁷ Xilloti waassoosona; waassin GODAI eta waasuwaa siyees. I eta meto ubbaappe ashshees.

¹⁸ GODAI wozanai me77idoogeetussi mataana; qassi bantta ayyaanan liiqidaageeta ashshees.

¹⁹ Xillo asa metoi daro; shin GODAI a he ubbaappe ashshees.

²⁰ GODAI a mintti naagiyo gishshau, a meqettaappe issoinne meqqenna.

²¹ Iitata iitatettai worana; xillota ixxiyaageeti pirddettana.

²² GODAI ba ashkkarata ashshees. Akko baqatida ooninne pirddettenna.