Mazamure Maxaafaa 33 - Wolaytta Bible

¹ Inttenoo, xillotoo GODAASSI ufaissan yexxite; suure asati a galatanau bessees.

² Maazinqqiyaa diixxiiddi, GODAA galatite; tammu baqettan waaxettida diittaakka ayyo diixxite.

³ Ooratta yettaa yexxite; loitti diixxiiddi, qaalaa xoqqissidi yexxite.

⁴ GODAA qaalai suure; i oottiyo ooso ubbai ammanettiyaagaa.

⁵ GODAI xillotettaanne tumu pirddaa dosees; aggenna a siiqoi sa7aa kumiis.

⁶ GODAA qaalan saloti merettidosona. A doonaappe kiyiya shemppuwan etan de7iya awai, aginainne xoolintteti oosettidosona.

⁷ Gita abbaa haattaa i issidiran eelissiis; he ciimma haattaa issisan zeeriis.

⁸ Sa7a ubbai GODAAYYO yayyo; sa7an de7iya asai ubbai GODAA bonchcho.

⁹ Aissi giikko, i haasayin haniis; i azazin, minnidi eqqiis.

¹⁰ GODAA erenna kawotettatu zoretaa GODAI laalees; eta halchchuwaakka halissees.

¹¹ GODAA halchchoi merinaassi eqqidi de7ees; a wozanaa qofaikka yeleta ubbaa gakkanau de7ees.

¹² Xoossai GODAA gidido kawotettai, i baassa oottidi doorido asai anjjettidaagaa.

¹³ GODAI saluwaara duge xeellidi, asaa ubbaa be7ees.

¹⁴ GODAI ba de7iyoosaappe sa7an de7iya ubbaa xeellees.

¹⁵ I eta ubbaa wozanaa medhdhees; eti oottiyoobaa ubbaa erees.

¹⁶ Kawoi ba wotaaddaraa coratettan attenna; olanchchai ba wolqqaa minotettan kessi ekkenna.

¹⁷ Ola pari xoonissana giidi naagiyoobi mela; i ba wolqqaa minotettan ashshanau danddayenna.

¹⁸ GODAA aifeti ayyo yayyiyaanne aggenna a siiquwan ufaissaa oottiya asatu bollaana.

¹⁹ Hegeenne, eta haiquwaappe ashshanaassanne koshaa wodiyan paxa wottanaassa.

²⁰ Nuuni GODAN ufaissaa oottoos; i nuna maaddiyaagaanne nu gonddalle.

²¹ Nuuni a geeshsha sunttan ammanettiyo gishshau, nu wozanai an ufaittees.

²² Abeet GODAU, nuuni nenan ufaissaa oottiyoogaadan, aggenna ne siiqoi nunaara gido.