Mazamure Maxaafaa 32 - Wolaytta Bible

Daawita timirttiyaa

¹ A mooroi atto geetettidonne a nagarai kamettido urai anjjettidaagaa.

² GODAI a iitatettaa qoodenna asinne a qofan baletoi bainna asi anjjettidaagaa.

³ Ta nagaraa paaxennan de7aidda, taani gallassa kumettaa oolidoogee ta asatettai daafuriis.

⁴ Gallassinne qammi ne kushee ta bolli deexxiis. Haattai bone awan melidi wuriyoogaadan, ta wolqqai wuriis.

⁵ Taani ta nagaraa neessi paaxaas; ta iitatettaakka neeppe genttabeikke; “Ta mooruwaa GODAASSI paaxana” gaas. Yaatin, neeni tana deexxida nagaraa atto yaagadasa.

⁶ Hegaa gishshau, Xoossaa asa gidiya ooninne, neeni beettishin, nena woosso. Gita haattai kixxiyo wode, tumuppe he uraa gakkenna.

⁷ Neeni taayyo qosettiyo soho; neeni tana metuwaappe naagana. Atotettaa yettaa yexxiyaageeta ta yuushuwan wottadasa.

⁸ GODAI, “Taani nena erissananne neeni baanau bessiya ogiyaa nena tamaarissana; taani nena zorananne naagana.

⁹ Bixaalaaninne puluwan ohettennan azazettenna, wozani bainna baqulodan woi paradan intte hanoppite” yaagees.

¹⁰ Iitatuyyo tuggai darana; shin GODAN ammanettiyaageeta aggenna siiqoi dooddana.

¹¹ Inttenoo, xillotoo, GODAN ufaittitenne “Hashshu!” giite; inttenoo, wozanaa suuretoo, ufaissau yexxite.