Mazamure Maxaafaa 30 - Wolaytta Bible

Daawita mazamuriyaa, Beeta Maqidasiyaa anjjissiyo gallassi yexxidoogaa

¹ Abeet GODAU, neeni tana ciimmaappe kessido gishshaunne ta morkketan, “Hashshu au” giissabeenna gishshau, taani nena xoqqu xoqqu oottana.

² Abeet GODAU ta Xoossau, neeni tana maaddanaadan, taani nena xeesaas; xeesin neeni tana pattadasa.

³ Abeet GODAU, tana duufuwaa beennaadan naagadasa; duge ciimma ollan gelennaadan, neeni tana paxa ashshadasa.

⁴ Inttenoo Xoossaa asatoo, GODAAYYO yexxite; a geeshsha sunttaakka galatite.

⁵ A hanqqoi guutta wodiyaassa, shin a kehatettai de7o laitta ubbaassa. Qammi yeekiiddi aqikko, maalladoi ufaissa gidees.

⁶ Taani woppan de7iyo wode, “Simmi taani mulekka yeeqikke” yaagaas.

⁷ Abeet GODAU, neeni taayyo kehido wode, tana gita deriyaadan minttada essadasa. SHin neeni ne sinttaa wora zaarido wode, taani dagammaas.

⁸ Abeet GODAU, taani nena xeesaas; taani GODAASSI watiwatada hagaadan yaagaas;

⁹ “Taani haiqqiyoogaappe woikko duufuwan geliyoogaappe ai demmuutee? Baanau laamettida asi nena galatii? Neeni ammanettiyoogaa yootii?

¹⁰ Abeet GODAU, taayyo neeni siya; taayyo qaretta. Abeet GODAU, neeni taayyo maado gida” yaagaas.

¹¹ Ta yeehuwaa yettau laammadasa. Kayyo maayuwaa taappe qaarada, ufaissaa tana maizzadasa.

¹² Hegaa gishshau, taani nena sabbanaappe attin, co77u giikke. Abeet GODAU ta Xoossau, taani nena merinaukka galatana.