Mazamure Maxaafaa 27 - Wolaytta Bible

Daawita mazamuriyaa

¹ GODAI taayyo poo7onne tana ashshiyaagaa; yaatin, taani ooyyo yayyanee? GODAI ta de7oi naagettiyo miixaa; yaatin, taani ooyyo dagammanee?

² Iita asati, ta ixotinne ta morkketi tana woranau taakko horddofiyo wode, eti banttau xubettidi kunddana.

³ Morkkiya toorai tana dooddiyaakkokka ta wozanai yayyenna. Olai ta bolli woraajjiyaakkokka, taani GODAN ammanettais.

⁴ Taani GODAA issibaa oichchaas; taani hegaa koyaas; hegeenne, taani ta de7o laitta ubban GODAA keettan de7anaagaa; de7aidda, taani GODAA lo77otettaa be7anaagaanne a Beeta Maqidasiyan a koyanaagaa.

⁵ Hegaa gishshau, metuwaa gallassan i tana ba de7iyoosan genttana; ba dunkkaaniyan i tana qosi ashshana. I tana xoqqa shuchchaa bollan essana.

⁶ He wode taani tana dooddida ta morkketuppe gitatada, xoqqu xoqqu yaagana. Taani a dunkkaaniyan ufaittaidda yarshshuwaa yarshshana. Taani GODAAYYO diixxananne yexxana.

⁷ Abeet GODAU, taani nena xeesiyo wode, neeni taayyo koya; taayyo qaretta; taayyo siya.

⁸ Neeni, “Ta sinttaa koyite” giido wode, ta wozanai, “Abeet GODAU, eeno; taani ne sinttaa koyana” yaagiis.

⁹ Ne sinttaa taappe genttoppa. Tana maaddidaagoo, tana ne ashkkaraa hanqqettada guyye zaaroppa. Abeet tana ashshiya Xoossau, tana oloppanne aggoppa.

¹⁰ Ta aawainne ta aayyiyaa tana aggiyaakkonne GODAI tana dichchana.

¹¹ Abeet GODAU, ne ogiyaa tana tamaarissa; ta morkketu gishshau, tana suure ogiyaa kaaletta.

¹² Tana naassiya worddo markkati ta bolli denddido gishshau, tana ta morkketu amuwaayyo aattada immoppa.

¹³ GODAA kehatettaa taani paxa de7aidda be7anaagaa ammanais.

¹⁴ GODAN ufaissaa wotta; minnadanne wozannaamada, GODAN ufaissaa wotta.