Mazamure Maxaafaa 25 - Wolaytta Bible

Daawiti xaafidoogaa

¹ Abeet GODAU, ta shemppuwaappe nena woossais.

² Abeet ta Xoossau, taani nenan ammanettais; tana yeellayoppa; ta morkketu haittaa kessoppa.

³ Nenan ufaissaa oottiyaageeti yeellatokkona; shin gaasoi bainnan geniyaageeti yeellatana.

⁴ Abeet GODAU, tana ne ogiyaa bessa; ne ogiyaa tana tamaarissa.

⁵ Neeni tana ashshiya Xoossaa gidiyo gishshau, ne tumatettan tana kaalettanne tamaarissa. Gallassa kumettan taani nenan ufaissaa oottais.

⁶ Abeet GODAU, beniisappe de7iya ne maarotaanne aggenna ne siiquwaa hassaya.

⁷ Ta yelagatettaa nagaraanne mooruwaa hassayoppa. Abeet GODAU, neeni keha gidiyo gishshau, aggenna ne siiquwaadan tana hassaya.

⁸ GODAI kehanne suure; hegaa gishshau, nagaranchchata ba ogiyaa tamaarissees.

⁹ Ashkketa suuretettan kaalettees; ashkketa ba ogiyaa tamaarissees.

¹⁰ GODAA maachchaanne a awaajjuwaa naagiyaageetayyo a ogee ubbai tumatettanne aggenna siiqo.

¹¹ Abeet GODAU, ta nagarai keehi daro; gidikkokka, ne sunttaa gishshau, atto yaaga.

¹² GODAASSI yayyiya asi oonee? I kaallanau bessiyo ogiyaa GODAI a tamaarissana.

¹³ I ubbatookka lo77o duussaa de7ana; a zerettati biittaa laattana.

¹⁴ GODAI baayyo yayyiyaageetau ba xuuraa shaakkiyaagaa; i etau ba maachchaakka minttees.

¹⁵ GODAI ta gediyaa piriyaappe kessiyo gishshau, ta aifee maaduwaassi ubbatoo akko xeellees.

¹⁶ GODAU, taani tarkka de7iya qohettida asa gidiyo gishshau, haa taakko simma; taayyo qaretta.

¹⁷ Taayyo hirggai dariis; ta metuwaappe tana neeni kessa.

¹⁸ Ta metuwaanne ta tuggaa neeni be7a. Ta nagaraa ubbaa atto ga.

¹⁹ Ta morkketi ai keena daridaakkonne be7a; eti tana woranaadan ixxiyoogaa xeella.

²⁰ Neeni tana naaga; neeni tana ashsha; taani neekko baqatido gishshau, tana yeellayoppa.

²¹ Taani nenan ufaissaa oottido gishshau, suuretettainne tumatettai tana naago.

²² Abeet Xoossau, Israa7eela asaa eta meto ubbaappe neeni ashsha.