Mazamure Maxaafaa 24 - Wolaytta Bible

Daawita mazamuriyaa

¹ Sa7ainne sa7an kumidabai ubbai GODAABAA; biittainne biittan de7iyaabai ubbai abaa.

² Aissi giikko, sa7aa gita abbaa bollan i hiixxiis; ciimma haattaa bollan minttidi essiis.

³ GODAA deriyaa gi77anau bessiyaagee oonee? A geeshsha sohuwan eqqanau bessiyaagee oonee?

⁴ A kushee nagaraappe geeyidoogaa, a wozanai geeshsha gididoogaa, eeqau goinnennaagaa, wordduwan caaqqennaagaa.

⁵ I GODAAPPE anjjuwaa ekkana; ashshiya Xoossaappe i xillotettaa ekkana.

⁶ Xoossaakko xeelliya asainne Yaaqooba Xoossaa sinttaa koyiya asai hageetu mala.

⁷ Kareta dooyite! Bonchcho kawoi gelana mala, he beni penggeti dooyettona!

⁸ He bonchcho kawoi oonee? Minoinne wolqqaamai GODAATTENNEE! Olaukka i wolqqaama GODAATTENNEE!

⁹ Kareta dooyite! Bonchcho kawoi gelana mala, he beni penggeta dooyite!

¹⁰ Ha bonchcho kawoi oonee? Ha bonchcho kawoi Ubbaappe Wolqqaama GODAATTENNEE!