Mazamure Maxaafaa 21 - Wolaytta Bible

Daawita mazamuriyaa

¹ Abeet GODAU, kawoi ne minotettan ufaittees; neeni immido xoonuwan i aiba ufaittii!

² Neeni a wozanaa amuwaa ayyo immadasa; qassi i nena ba inxxarssan oichchidobaa diggabaakka.

³ Neeni lo77o anjjuwaara akko yaasa; geeshsha worqqa kallachchaa a huuphiyan wottaasa.

⁴ Neeni de7uwaa ayyo immanaadan nena woossiis; woossin ayyo immadasa. Meri merinau a bariyaa adussadasa.

⁵ Neeni xoonuwaa immido gishshau, a bonchchoi darees; gitatettaanne anggaa ayyo immadasa.

⁶ Neeni ayyo merinaa anjjuwaa immaasa; ne achchan de7iyo ufaissan a ufaissaasa.

⁷ Kawoi GODAN ammanettees. Ubbaappe Xoqqiya Xoossai a aggennan siiqiyo gishshau, i yeeqenna.

⁸ Ne kushee ne morkketa ubbaa kutuutana; ne ushachchai nena ixxiyaageeta oiqqana.

⁹ Neeni qoncciyo wode, eta tama coociyaadan xuuggana. GODAI ba hanqquwaa suuluwan eta mittana; a tamaikka eta mi xaissana.

¹⁰ Neeni eta naata biittaappe, eta zerettaakka asaa giddoppe xaissana.

¹¹ Ne morkketi ne bolli yaa7oosonanne iitabaa maqettoosona; shin polokkona.

¹² Aissi giikko, neeni eta ne wonddafiyaa zubbiyan dukkanau baabisana; baabisada guyye zaarada baqatissana.

¹³ Abeet GODAU, ne minotettan xoqqu xoqqu ga; ne wolqqaassi nena sabboosinne galatoos.