Mazamure Maxaafaa 2 - Wolaytta Bible

¹ Kawotettati aissi denddiyoonaa? Qassi asai aissi pattennabaa maqettii?

² Sa7aa kawotinne deriyaa haariyaageeti denddidosona; eti GODAA bollinne GODAI tiyidoogaa bolli issippe shiiqidosona.

³ Eti, “Nuuni eta sanssalataa duuttoos; eti nuna qachchiyoogaakka wora oloos” yaagoosona.

⁴ Saluwan ba araatan uttidaagee eta bolli miiccees; Godai eta bolli qilliiccees.

⁵ Qilliiccidi i ba hanqquwan eta seerees; ba wolqqaama hanqquwan eta yashissees.

⁶ Godai, “Taani ta geeshsha deriyaa Xiyoone bolli ta kawuwaa kawoyaas” yaagees.

⁷ He kawoi, “Taani GODAA higgiyaa awaajjana; GODAI tana, 'Neeni ta na7aa; taani hachchi neeyyo aawa gidaas.

⁸ Neeni tana woossa; taani kawotettaa ubbaa neeyyo immana; sa7a ubbai nebaa gidana.

⁹ Neeni birata xam77an eta haarana; eta neeni urqqa miishshaa menttiyoogaadan menttana' yaagees” yaagiis.

¹⁰ Hegaa gishshau, inttenoo kawotoo, eeyyoppite; ha sa7aa haariyaageetoo, inttena ye77e!

¹¹ GODAAYYO bonchcho yashshatettan oottite; yashshaa kokkoriyoogan ufaittite.

¹² GODAI hanqqettin, ogiyan intte xayennaadan na7aa yerite; aissi giikko, hanqquwaa eesuwan i eexxi kiyana. Baqati an qosetti attiya ubbati anjjettidaageeta.