Mazamure Maxaafaa 19 - Wolaytta Bible

Daawita mazamuriyaa

¹ Saloti Xoossaa bonchchuwaa haasayoosonanne salotu gufanttoi i ba kushiyan oottidobaa awaajjees.

² Issi gallassai hankko gallassaayyo hegaa yootees; issi qammaikka hankko qammaayyo eratettaa qonccissees.

³ Haasayi woikko qaali baawa; eta cenggurssaikka siyettenna.

⁴ Gidikkokka, eta haasayaa cenggurssai sa7a ubban laalettiis; eta qaalaikka sa7aa gaxaa gakkiis. Xoossai awai de7iyo sohuwaa saluwan giigissiis.

⁵ Ufaittiiddi karesooppe kiyiya mishiraadan, wottaa naasiyaayyo giigida wottanchchaadan, awai maallado maallado kiyees.

⁶ Awai issi bagga saluwaa gaxaappe mokkidi, hara bagga saluwaa gaxaa gakkanaassi bees; a ho77uwaappe geemmiyaabi aibinne baawa.

⁷ GODAA higgee suure; shemppuwaa zaarees. GODAI yootiyoogee ammanettiyaagaa; akeekai paccidoogeetussi eratettaa immees.

⁸ GODAA wogai likke; wozanaa ufaissees. GODAA azazoi geeshsha; wozanaa poo7issees.

⁹ GODAASSI bonchchuwan yayyiyoogee lo77o yoho; hegee merinaukka eqqidi de7iyaagaa. GODAA pirddai tuma; i ubbatonkka xillo.

¹⁰ Worqqaappenne walahi bainna worqqaappe aadhdhidi dosettees; eessaappenne eessaa ililuwaappe aadhdhi mal77ees.

¹¹ Qassi tana ne ashkkaraa naagettanaadan zorees; ne higgiyaa naagiyoogan taani daro go7ettais.

¹² Ba huuphe balaa demmiyai oonee? Abeet GODAU, geemmida nagaraappe tana geeshsha.

¹³ Qassi taani, ne ashkkarai, xalan nagaraa oottennaadan, neeni tana naaga. Tana nagarau haarissoppa; he wode taani suure gidada, gita mooruwaappe geeyana.

¹⁴ Abeet GODAU, ta wogga zaallau, tana wozidaagoo, ta doonaappe kiyiya qaalainne ta wozanaa qofai nena ufaissiyaabaa gido.