Mazamure Maxaafaa 18 - Wolaytta Bible

GODAA ashkkaraa Daawita mazamuriyaa. GODAI a morkketu ubbaa kushiyaappenne Saa7oola kushiyaappe ashshido wode Daawiti GODAASSI ha yettaa yexxiis.

¹ Abeet GODAU, ta wolqqau, taani nena siiqais.

² GODAI tau wogga zaallaa; taani olaappe naagettiyo miixaa; i tana ashshiyaagaa. Ta Xoossai taani akko baqatiyo ta wogga zaallaa. I ta gonddalliyaa. I tana ashshiya wolqqaamaa; i taani qosetta attiyo soho.

³ Galatai bessiyo GODAA taani xeesais; i ta morkketuppe tana ashshees.

⁴ Haiquwaa hirggai wodorodan tana phuphphuriis; bashshai di7odan tana muukkiis.

⁵ Duufuwaa wodoroi tana qachchana hanees; haiqoi piredan tana oiqqiis.

⁶ Tana metoi iissin, GODAA xeesaas; “Tana maadda” gaada ta Xoossaayyo waassaas. I ba Beeta Maqidasiyan ta cenggurssaa siyiis; taani waassido waasoi a haittan wodhdhiis.

⁷ Wodhdhin Xoossai hanqqettido gishshau, biittai yaaqiyaaqidi qaaxxiis; deretu xaphoi gajigajidi kokkoriis.

⁸ A siiriyaappe hanqquwaa cuwai cuwattiis; a doonaappe miya tamaa lacoinne xuuggiya bonqqoi kiyiis.

⁹ Saluwaa i phalqqidi, duge wodhdhiis; he wode a gediyaappe garssaara sikkida shaarai de7ees.

¹⁰ Qefiyaara de7iya kiitanchchaa kiruubiyan uttidi paalliis; carkkuwaa qefiyaa ekkidi eesotiis.

¹¹ Bana xuman kammiis; a dunkkaanee iraara sikkida shaaraa.

¹² A sinttan de7iya gita poo7uwaappe shachchainne tamaa lacoi kiyiis; kiyidi sikkida shaaraa kanttidi biis.

¹³ Qassi GODAI dadaadan saluwaappe guummiis; Ubbaappe Xoqqiya Xoossai ba cenggurssaa sissiis.

¹⁴ Ba wonddafiyaa zubbiyaa yeddidi, ba morkketa laaliis; wolqqanttaa poo7uwaa kiittidi, eta yedettiis.

¹⁵ Abeet GODAU, neeni seerido wodenne, hanqqettada peenuqido wode, abbaa haattai zin77ido biittai beettiis. Qassi sa7aa baasoikka qoncciis.

¹⁶ GODAI bollappe kushiyaa duge yeddidi, tana oiqqiis; ciimma haattaappe tana kessiis.

¹⁷ I tana ta wolqqaama morkkiyaappenne tana ixxiyaageetuppe ashshiis. Aissi giikko, eti taayyo keehi daro wolqqaama.

¹⁸ Ta waayiyaa gallassi eti ta bolli denddidosona; shin GODAI tana zemppissiyaagaa.

¹⁹ I tana aaho sohuwaa kessiis; tanan ufaittido gishshau, tana ashshiis.

²⁰ Ta xillotettaadan GODAI tau qanxxiis; ta kushiyaa geeshshatettaadan i tau zaariis.

²¹ Taani GODAA ogiyaa kaallaas; taani ta Xoossaa aggada wora babeikke.

²² Taani a higgiyaa ubbaa naagaas; a wogaa poliyoogaa aggabeikke.

²³ Taani a sinttan suure de7aas; taani tana nagarappe naagaas.

²⁴ Hegaa gishshau, GODAI tau ta xillotettaadaaninne ta kushee a sinttan geeshsha gidiyoogaadan zaariis.

²⁵ Abeet GODAU, ammanettiyaageetuyyo neeni ammanettiyaagaa; suuretuyyo neenikka suure.

²⁶ Geeshshatuyyo neenikka geeshsha; shin geellatuyyo neeni cincca.

²⁷ Banttana ziqqissiyaageeta ashshaasa; shin banttana xoqqissiyaageeta neeni ziqqissaasa.

²⁸ Abeet GODAU, neeni ta xomppiyaa poo7issaasa; ta Xoossai poo7issin, ta xumai kichchees.

²⁹ Ne maaduwan taani ta morkke wotaaddaratu bolli woraajjais; ta Xoossan taani eta miixaa xeeraara guppa aadhdhais.

³⁰ Xoossaa ogee suure. GODAA qaalai ammanettiyaagaa. Akko baqatiya ubbatussi i gonddalle.

³¹ GODAAPPE attin, hara xoossi baawa; nu Xoossaappe attin, hara wogga zaalli baawa.

³² Taayyo wolqqaa immiyaageenne ta ogiyaa saro oottiyaagee Xoossaattennee.

³³ I ta gediyaa genessaa gediyaadan minttees; tana xoqqa sohotun sarotettan wottees.

³⁴ I ta kushiyaa olaa meezeyees; hegaa gishshau, taani ta qesiyan nahaasiyaa giyo birataa wonddafiyaa dafada dukkais.

³⁵ Tana ashshiya ne gonddalliyaa neeni taayyo immadasa. Ne ushachcha kushee tana zemppissees; ne lo77o ohettai tana gitayees.

³⁶ Ta hemettiyoosaa aassaasa; hegaa gishshau, ta tohoi harchchibeenna.

³⁷ Ta morkketa taani yedetta oiqqaas; taani eta xaissennan de7aidda guyye simmabeikke.

³⁸ Taani eta naa77antto denddennaadan shocaas; eti ta tohuwan wullidosona.

³⁹ Olau tana wolqqaa gixissadasa; tanaara gaaddetiyaageeta taayyo gulbbatissadasa.

⁴⁰ Ta morkketa ta sinttappe guyye baqatissadasa; tana ixxiyaageeta taani xaissaas.

⁴¹ Banttana maaddana mala waassidosona, shin ooninne eta ashshibeenna. GODAAKKA eti xeesidosona, shin i etau koyibeenna.

⁴² Carkkoi pittidi efiyo baanadan taani eta liiqissaas; ogiyan de7iya urqqaadankka eta yedhdhaas.

⁴³ Makkala asappe tana ashshadasa. Tana kawotettatu bollan sunttadasa; taani erenna asai tau haarettiis.

⁴⁴ Eti ta woriyaa siyidi, tau azazettoosona; allaga dere asaikka ta sinttan lahottees.

⁴⁵ Eti wozanaa kahaa bayoosona. Bantta naagettiyo miixaappe kokkoriiddi yoosona.

⁴⁶ GODAI de7ees! Xoossai, ta wogga zaallai galatetto! Tana ashshiya Xoossai xoqqu xoqqu go!

⁴⁷ I ta haluwaa kessiya Xoossaa; kawotettata taappe garssaara haarissiyaagaa;

⁴⁸ ta morkketuppe tana ashshiyaagaa. Abeet GODAU, neeni tanaara gaaddetiyaageetu bollan tana xoqqu xoqqu oottaasa; makkalanchcha asatuppe neeni tana ashshaasa.

⁴⁹ Hegaa gishshau, taani nena kawotettatu giddon galatana; taani ne sunttaa sabbana.

⁵⁰ Xoossai ba kawuwaassi xoonuwaa bollan xoonuwaa immees. Ba tiyidoogaassi, Daawitassinne a zerettaassi, aggenna siiquwaa merinau bessees.