Mazamure Maxaafaa 17 - Wolaytta Bible

Daawita woosaa

¹ Abeet GODAU, neeni taayyo xillo pirddaa pirddana mala, taani nena oichchiyoogaa siya; ta waasuwaa ezgga. Taani cimmenna inxxarssaappe woossiyo woosaakko, ne haittaa zaara.

² Ta shatinttai ne sinttappe yo; ne aifee likke gidiyaagaa xeello.

^3-4 Neeni qamman tana xomoosadasa; ta wozanaa paaccadasa. SHin paaccadakka; ta bolli ainnekka demmakka. Taani hara asatudan iita qaalaa haasayikke; taani ne azazuwaa naagiyo gishshau, gene ogiyaa kaallabeikke.

⁵ Taani ubbatoo ne ogiyan hemettais; mulekka ne ogiyaappe gaxi kiya erikke.

⁶ Abeet Xoossau, taani woossin, neeni siyiyo gishshau, taani nena woossais. Ne haittaa taakko zaarada, taani neeyyo yootiyoogaa ezgga.

⁷ Bantta morkketuppe baqatiyaageeta ne ushachcha kushiyan qottada ashshiyaagoo, garamissiya aggenna ne siiquwaa bessa.

⁸ Ne aifiyaa na77iyaadan tana naaga; ne qefiyaa giddon tana qotta.

⁹ Tana un77i wottida iitatuppenne dooddi wottida diina morkketu kushiyaappe tana qosa.

¹⁰ Etassi qareti baawa; otoruwan haasayoosona.

¹¹ Taani biyo soho ubban eti tana dooddoosona. Tana biittan aatti yegganau xeelloosona.

¹² Eti banttau miyoobaa koyiya gaammotu mala; geeman zuggi naagiya wodala gaammotu mala.

¹³ Abeet GODAU, dendda. Ta morkketuura eqettada xoona; ne bisuwan iitatuppe tana ashsha ekka.

¹⁴ Abeet GODAU, hagaa mala asaappe, eta qaadai ha sa7aa de7uwaa xalaalaa gidiyo asaappe ne kushiyan tana ashsha. Neeni etayyo minjjido boshan eta qaxxaya; he boshainne eta naatussi gididi, eta naatu naatussikka palaho.

¹⁵ SHin taani xillotettan nena be7ana. Taani denddiyo wode, nena be7ada ufaittana.