Mazamure Maxaafaa 149 - Wolaytta Bible

¹ GODAA galatite! GODAAYYO ooratta yettaa yexxite! Ammaniyaageetu yaa7an a sabbite!

² Israa7eela asati banttana medhdhidaagan ufaittona. Xiyoone asati bantta kawuwan keehippe ufaittona.

³ Duriiddi, karaabiyaa baqqiiddinne diittaa diixxiiddi, a sunttaa sabbona.

⁴ Aissi giikko, GODAI ba asan ufaittees; naaqettidaageetau xoonuwaa immidi, i eta bonchchees.

⁵ Xoossaa asati bantta xoonuwan ufaittona; qamman ubban ufaissau yexxona.

⁶ Eta doonan Xoossaa galatai, eta kushiyankka naa77u bagga qara bisoi de7o.

⁷ Hegeenne, eti kawotettatuyyo haluwaa kessanaassanne asata qaxxayanaassa.

⁸ Eta kawota sanssalatan, eta ola gadaawatakka biratan qachchanaassanne,

⁹ eta bolli xaafettida pirddaa polanaassa. Hegee Xoossaa asatu ubbaayyo xoono. GODAA galatite!