Mazamure Maxaafaa 148 - Wolaytta Bible

¹ GODAA galatite! Salotun de7iyaageetoo, GODAA galatite; bolla xoqqan de7iyaageetoo, a galatite.

² Inttenoo, a kiitanchchatoo, ubbai a galatite. Saluwan de7iya a olanchchatoo, ubbai a galatite.

³ Awau, aginau, a galatite; poo7iya xoolinttetoo, ubbai a galatite.

⁴ Inttenoo, ubbaappe bolla xoqqan de7iya salotoo, a galatite. Salo gufanttuwaappe bollaara de7iya haattatoo, a galatite.

⁵ Eti ubbati GODAA sunttaa galatona; aissi giikko, i azazin, eti ubbaikka merettidosona.

⁶ I eta meri merinau eta sohuwan sohuwan wottiis. Eti mulekka ixxanau danddayenna azazuwaa i etau immiis.

⁷ Sa7an de7iyaageetoo, GODAA galatite! Miimminttetoo, gita abbaa ciimmatoo, ubbatikka a galatite.

⁸ Inttenoo, wolqqanttau, shachchau, shaarau, cigaarau, a azazuwaa poliya gotiyau, ubbatikka a galatite.

⁹ Inttenoo, deretoo, keratoo, miyo aifiyaa aifiya mittatoo, zigatoo, ubbatikka a galatite.

¹⁰ Mehetoo, do7atoo, sa7aara gooshettiya meretatoo, paalliya kafotoo, ubbatikka a galatite.

¹¹ Sa7aa kawotoo, kawotettaa asatoo, halaqatoo, deriyaa haariyaageetoo, ubbatikka a galatite.

¹² Wodallatoo, geela7otoo, cimatoo, naatoo, ubbatikka a galatite.

¹³ Eti ubbati GODAA sunttaa galatona; aissi giikko, a sunttai ubbaappe bollaara de7iyaagaa; a bonchchoi salotuppekka sa7aappekka bollaara xoqqan de7ees.

¹⁴ A bagga gidiya, ayyo matattiya Israa7eela asati a galatana mala, i eta minttiis. GODAA galatite!