Mazamure Maxaafaa 147 - Wolaytta Bible

¹ GODAA galatite! Nu Xoossaa sabbiyoogee lo77ottennee; a sabbiyoogee ufaissiyaabaanne bessiyaabaa.

² GODAI Yerusalaame bottokonees; Israa7eela asatuppe betidaageetakka shiishshees.

³ Wozanai meqqidoogeeta i pattees; eta mazunttaakka i qachchees.

⁴ I xoolintteta medhdhiyo wode, eta qoodaa likkiyan wottiis; eta ubbaakka eta sunttan sunttan xeegees.

⁵ Nu Godai gita; a wolqqai daro; a akeekai likkiyaappe aadhdhiyaagaa.

⁶ GODAI naaqettidaageeta zemppissees; shin iitata biittan duge olees.

⁷ GODAASSI galataa yettaa yexxite; nu Xoossaassi diittaa diixxite.

⁸ I saluwaa shaaraa maizzees; sa7aassi iraa bukissees; qeera deretu bolli maataa mokissees.

⁹ Mehetuyyoonne waassiya quuro maratuyyo miyoobaa i immees.

¹⁰ I ufaittiyoi paratu wolqqaaninne tooranchchatu minotettan gidenna.

¹¹ GODAI bau yayyiyaageetuuninne aggenna a siiquwan bantta ufaissaa wottidaageetun ufaittees.

¹² Yerusalaame katamau, GODAA galata! Xiyoonee, ne Xoossaa galata!

¹³ Aissi giikko, i ne penggiya hiraquwaa minttees; ne giddon de7iya ne asaakka anjjees.

¹⁴ I ne zawaa sarotettan naagees; nena keehippe lo77iya gisttiyaa kalssees.

¹⁵ I ba kiitaa biittaayyo kiittees; a qaalainne eesuwan gakkees.

¹⁶ I shachchaa bullukkodan miccees; akkaa bidinttaadan laalees.

¹⁷ I ba gita shachchaa shuchchaadan duge olees. He meeguwan eqqanau ooninne danddayenna.

¹⁸ I ba qaalaa kiittidi, shachchaa seerissees. I carkkuwaa carkkissin, haattai goggees.

¹⁹ I ba qaalaa Yaaqooba zerettaassi, ba awaajjuwaanne pirddaa Israa7eela asaassi awaajjees.

²⁰ I hara kawotettaa asaassi hagaa oottibeenna; eti a pirddaa erokkona. GODAA galatite!