Mazamure Maxaafaa 146 - Wolaytta Bible

¹ GODAA galatite! Tanooshsho, GODAA galata!

² Ta de7o laitta ubban taani GODAA galatana; taani de7ido keenan ubban ta Xoossaa sabbana.

³ Asi ashshanau danddayenna gishshau, asaa halaqatun ammanettoppite.

⁴ Eta shemppoi kiyiyo wode, eti biittau simmoosona; eta halchchoi ubbai he gallassikka atti aggees.

⁵ Yaaqooba Xoossai maaddiyo urainne GODAA ba Xoossaa baayyo ufaissa oottiya urai anjjettidaagaa.

⁶ Xoossai saluwaanne sa7aa, gita abbaanne a giddon de7iyaabaa ubbaa medhdhidaagaa; i merinaukka ammanettiyaagaa.

⁷ I naaqettidaageetau pirddiyaagaa; namisettidaageetau qumaa immiyaagaa. GODAI qashettidaageeta birshshees;

⁸ GODAI qooqeta xeelissees. GODAI kunddidaageeta denttees; GODAI xillota siiqees.

⁹ GODAI beteta naagees. Am77etanne aawai bainna naata maaddees; shin iitatu ogiyaa halissees.

¹⁰ GODAI merinau kawotees. Xiyoonee, ne Xoossai, yeletaappe yeletaa gakkanaassi kawotana. GODAA galatite!