Mazamure Maxaafaa 145 - Wolaytta Bible

Daawiti xaafido galata sabaa

¹ Abeet ta Xoossau, ta kawuwau, taani nena gitayananne ne sunttaa meri merinau galatana.

² Taani nena ubba gallassi sabbana; ne sunttaanne meri merinau galatana.

³ GODAI gita; aaro galatai ayyo bessees. A gitatettai asa qofaappe aadhdhees.

⁴ Issi yeletai hara yeletaayyo neeni oottidobaa yootana; ne maalaalissiya oosotakka awaajjana.

⁵ Eti ne bonchchuwaanne ne anggaa gitatettaabaa haasayana; taanikka ne maalaalissiya oosuwaa zaara zaarada qoppana.

⁶ Asai, “Hoola!” giissiya ne oosuwaa wolqqaabaa haasayana; taanikka ne gitatettaa awaajjana.

⁷ Eti ne kehatettaa daruwaabaa yootana; ne xillotettaabaakka yexxana.

⁸ GODAI qarettiyaagaanne maariyaagaa; i hanqqettanau eesotennaagaa; danddayanchchaanne aggenna siiqoi dariyoogaa.

⁹ GODAI ubbau keha; i ba medhdhido ubbau qarettiyaagaa.

¹⁰ Abeet GODAU, ne mereta ubbai nena galatana; ne asati ubbaikka nena sabbana.

¹¹ Eti ne kawotettaa bonchchuwaabaa haasayana; ne wolqqaabaa yootana.

¹² Hegeenne, ne wolqqaama oosuwaabaanne ne kawotettaa bonchchuwaa anggaabaa asaa erissanaassa.

¹³ Ne kawotettai merinaa kawotettaa; ne maatai yeleta ubbaa gakkanaassa. GODAI ba giido qaalau ubbau ammanettiyaagaa; i ba ooso ubban qarettiyaagaa.

¹⁴ GODAI hokkidaageeta ubbaa zemppissees; kunddidaageeta ubbaa denttees.

¹⁵ Ubbaa aifee neekko xeellees; eta koshshiyo wodiyan neeni etau qumaa immaasa.

¹⁶ Neeni ne kushiyaappe yeggada, paxa de7iyaageeta ubbaa amuwaa alaasa.

¹⁷ GODAI ba ogiyan ubban xillo; i ba ooso ubban qarettiyaagaa.

¹⁸ GODAI bana xeesiya ubbau, tuman bana xeesiya ubbau matan de7ees.

¹⁹ I baayyo yayyiyaageetu ubbaayyo amuwaa kunttees. Qassi i eta waasuwaa siyidi, eta ashshees.

²⁰ GODAI bana siiqiyaageeta ubbaa naagees; shin iitata ubbaa xaissana.

²¹ Taani ta doonan GODAA galatana. Mereta ubbai a geeshsha sunttaa meri merinau galato!