Mazamure Maxaafaa 144 - Wolaytta Bible

Daawiti xaafidoogaa

¹ GODAI, ta wogga zaallai galatetto! I ta kushiyaa olau, ta biradhdhetakka toorau loohissees.

² I tana siiqiya Xoossaanne ta qatuwaa; i ta miixaanne tana ashshiyaagaa. I ta gonddalliyaanne taani baqatada attiyo soho. Kawotettata i taayyo haarissiyaagaa.

³ Abeet GODAU, neeni ayyo qoppiyoogee asi aibee? Neeni kabboyiyoogee asa na7i aibee?

⁴ Asi issiton carkkiya carkko mala; a gallassatikka aadhdhiya kuwaa mala.

⁵ Abeet GODAU, ne saluwaa phalqqada duge wodhdha! Wogga dereta bochcha; etinne cuwattona!

⁶ Wolqqanttaa yeddada ne morkketa laala! Ne wonddafiyaa zubbiyaa yeddada eta yedetta!

⁷ Bollaara ne kushiyaa duge yeddada, tana ciimma haattatuppe goochchada kessa; allaga asatu kushiyaappe tana wotta ekka.

⁸ Eti tumaa haasayana giidi caaqqidikka, wordduwaa haasayoosona.

⁹ Abeet Xoossau, taani neeyyo ooratta yettaa yexxana; tammu baqettan waaxettida diittaa neeyyo diixxana.

¹⁰ Kawotussi xoonuwaa immaasa; ne ashkkaraa Daawita ashshaasa.

¹¹ Tana pala bisuwaappe ashsha; allaga asatu kushiyaappe tana wotta ekka. Eti tumaa haasayana giidi caaqqidikka, wordduwaa haasayoosona.

¹² Nu attuma naati bantta yelagatettan dalqqidalqqidi, dicciya mittaa mala gidona. Nu macca naatikka kawo keettaa zoozziyan alleequwau essido tuuqe mala gidona.

¹³ Nu gootarati daro dumma dumma qommo kattan kumona; nu dembbatun de7iya dorssati sha7aa, tammu sha7aa yelona.

¹⁴ Nu miizzati modhdhona; eti aucayennan yelettidi corattona. Nu ogetun dagama waasoi siyettoppo.

¹⁵ Ha yohoi tumu haniyo asati anjjettidaageeta. Eta Xoossai GODAA gidiyo asati anjjettidaageeta.