Mazamure Maxaafaa 143 - Wolaytta Bible

Daawiti xaafido mazamuriyaa

¹ Abeet GODAU, ta woosaa siya; ta watiwatuwaa ezgga. Neeni xillonne ammanettiyaagaa gidiyo gishshau, taayyo zaaruwaa imma.

² Ne sinttan xillo gidana asi baawa; hegaa gishshau, tana ne ashkkaraa pirddau shiishshoppa.

³ Tana ta morkkee yedettidi, biittaara gatti kinchcherettiis; beni haiqqida asatudan tana xuman wottiis.

⁴ Hegaa gishshau, taani hitaas; ta wozanaikka yibbaatiis.

⁵ Taani beni wodeta hassayais; neeni oottido oosuwaa ubbaa zaara zaarada qoppaisinne ne kushee oottidobaa akeekais.

⁶ Taani ta kushiyaa neekko miccaas; mela biittai haattaa koyiyoogaadan, taani nena saamettais.

⁷ Abeet GODAU, taayyo zaaruwaa immanau ellella! Taani hitaas. Taani duge duufuwan geliya asatu mala gidennaadan, ne som77uwaa taappe genttoppa.

⁸ Taani nena ammanettiyo gishshau, maallado aggenna ne siiquwaabaa tana sissa. Taani ta shemppuwaappe nena woossiyo gishshau, taani baanau bessiya ogiyaa tana tamaarissa.

⁹ Abeet GODAU, taani neekko baqatido gishshau, tana ta morkketuppe ashsha.

¹⁰ Neeni ta Xoossaa gidiyo gishshau, taani ne sheniyaa oottana mala, tana tamaarissa; taayyo keha; tana salalla ogiyaa kaaletta.

¹¹ Abeet GODAU, ne sunttaa gishshau, tana ashsha; ne xillotettan tana metuwaappe kessa.

¹² Aggenna ne siiquwan ta morkketa wora; ta baarigaarata ubbaa xaissa; aissi giikko, taani ne ashkkaraa.