Mazamure Maxaafaa 141 - Wolaytta Bible

Daawiti xaafido mazamuriyaa

¹ Abeet GODAU, taani nena xeesais; tana maaddanau ellella. Taani neessi waassiyo wode, ta cenggurssaa siya!

² Ta woosai ixaanaa cuwaadan ne sintti shiiqo; taani ta kushiyaa micciyoogee neeyyo omarssa yarshsho mala gido.

³ Abeet GODAU, ta doonaa naagiyaabaa wotta; ta menttershshatu penggiyan zabainnaa essa.

⁴ Moorobaa oottiya asatuura iita oosuwaa oottenna mala, ta wozanaa iitabaakko zaaroppa. Eta yarshshuwaa gibiraakka tana mizoppa.

⁵ Xillo asi tana aggenna siiquwan seeranaunne qaxxayanau danddayees; shin taani iita asatuppe bonchchuwaakka ekkennan ixxais; aissi giikko, taani ubbatonkka eta iita oosuwaa bolli woossais.

⁶ Eta daannati zaallaa aafuwaara duge olettiyo wode, ta qaalai tuma gidiyoogaa eta asai erana.

⁷ Mittai phalqqettiyoogaadaaninne pinccettiyoogaadan eta meqettaikka duufuwaa doonan laalettana.

⁸ Abeet Ubbaa Haariya GODAU, ta aifee nena xeellees; taani neekko baqatada attais; tana haiquwau aattada immoppa.

⁹ Eti taayyo yeggi wottido gitiyaappenne iitaa oottiyaageetu piriyaappe tana naaga.

¹⁰ Taani saro aadhdhishin, iitati bantta wottido gitiyan oiqettona.