Mazamure Maxaafaa 140 - Wolaytta Bible

Daawiti xaafido mazamuriyaa

¹ Abeet GODAU, iita asatuppe tana ashsha; makkalanchcha asatuppe tana naaga.

² Eti ubba wode iitabaa oottanau maqettoosona; ubba gallassikka ooshshaa denttanau karchchoosona.

³ Eti bantta inxxarssaa shooshshaagaadan qarayoosona; eta doonaappe asa woriya shooshshaa yiishshaa mala haasayai kiyees.

⁴ Abeet GODAU, iita asatu kushiyaappe tana ashsha; ta tohuwaa qaxxanau qoppiya makkalanchcha asatuppe tana naaga.

⁵ Otoranchcha asati taayyo diizzaa giigissidosona; gitiyaa hiixxidosona; tana oiqqanau piriyaa ogiyan wottidosona.

⁶ Taani GODAA, “Neeni ta Xoossaa” yaagais. Abeet GODAU, taani watiwatiyo watiwatuwaa siya.

⁷ Abeet Ubbaa Haariya GODAU, tana ashshiya minuwau, olaa gallassi ta huuphiyaa gonddalladasa.

⁸ Abeet GODAU, iitatuyyo eta amuwaa immoppa; eta iita maqquwaa polissoppa.

⁹ Ta morkketun tana xoonissoppa; eta doonaappe kiyiya iitabai etau simmo.

¹⁰ Eta bolli xuuggiya bonqqoi qoletto; eti ollan olettona; hegaappe naa77antto denddoppona.

¹¹ Zigiriyaageeta biittai tookkoppo; makkalanchcha asata iitabai yedetaa sirqqo.

¹² GODAI hiyyeesatussi pirddiyoogaanne metootanchchatu maataa naagissiyoogaa erais.

¹³ Tumuppe xilloti ne sunttaa galatana; suure asati ne sinttan de7ana.