Mazamure Maxaafaa 139 - Wolaytta Bible

Daawiti xaafido mazamuriyaa

¹ Abeet GODAU, neeni tana qoradasa; qoradakka eradasa.

² Taani aude uttiyaakkonne aude eqqiyaakko, neeni eraasa; neeni ta qofaa ubbaa haahuwan akeekaasa.

³ Taani biyoosaanne shemppiyoosaa xomoosaasa; ta ogeta ubbaa neeni eraasa.

⁴ Abeet GODAU, taani ta inxxarssan issi qaala haasayanaappe kasetada, neeni ta qofaa ubbaa eraasa.

⁵ Neeni ta yuushuwan ubba baggaarakka de7aasa; ne kushiyan tana naagaasa.

⁶ Ne eratettai tana keehippe maalaalissiyaabaa; taani akeekanau danddayiyoosaappe xoqqa.

⁷ Taani neeppe au baanau danddayiyaanaa? Woikko ne sinttaappe au baqatanau danddayiyaanaa?

⁸ Pude saluwaa kiyikko, neeni yan de7aasa! Duge Si7ooliyaa wodhdhikkokka, neeni yan de7aasa.

⁹ Awai mokkiyoosaa baggi paallada biikko, woikko awai wulliyoosaa baggan haakkada de7ikko,

¹⁰ he sohuwankka ne kushee tana kaalettees; ne ushachcha kushee tana zemppissees.

¹¹ Taani, “Xumau, tana gentta; poo7uwau, qammau laametta” yaagiyaakkokka,

¹² xumaa addiniitai neeyyo xumenna; qammai gallassaadan poo7ees; aissi giikko, neeyyo xumai poo7o mala.

¹³ Neeni ta giddo asatettaa ubbaa medhdhadasa; ta aayee uluwan tana neeni tiladasa.

¹⁴ Neeni tana maalaalissiya oorattabaa oottada medhdhido gishshau, taani nena galatais. Ne oosoti maalaalissiyaageeta! Taani qassi hegaa wurssada erais.

¹⁵ Taani geema sohuwan merettiyo wode, ta meqettati neeppe geemmibookkona. Ta bollai ta aayee uluwaa ciimmaa giddon hiillan alleeqettidi oosettiyo wode,

¹⁶ yelettibeenna ta bollaa ne aifee be7iis. Biron issoinne doomettennan de7iiddi, taayyo neeni bazzido gallassati ubbati ne mazggafan xaafettidosona.

¹⁷ Abeet Xoossau, ne qofati aiba corattidonaa! Eta eranaagee aiba waayissii!

¹⁸ Taani eta qoodiyaakko, eti shaahetaappe darana shin. Taani beegottiyo wode, ha77ikka nenaara de7ais.

¹⁹ Abeet Xoossau, neeni iitata woranddiishsha! Suuttaa gussiya asati taappe haakkona!

²⁰ Eti ne bolli iitabaa haasayoosona; ne morkketi ne sunttaa mooroosona.

²¹ Abeet GODAU, nena ixxiyaageeta taani ixxikkinaa? Ne bolli denddiyaageeta taani shenetikkinaa?

²² Taani eta mule ixxais; eta taani ta morkketudan qoodais.

²³ Abeet Xoossau, tana qorada, ta wozanaa era; tana paaccada, ta qofaa era.

²⁴ Ane tanan iitabai de7ikko xeella; xeellada, merinaa ogiyan tana kaaletta.