Mazamure Maxaafaa 138 - Wolaytta Bible

Daawiti Xaafidoogaa

¹ Abeet GODAU, taani ta kumetta wozanaappe nena galatana; xoossatu sinttan nena sabbana.

² Ne geeshsha Beeta Maqidasiyaakko simmada ziggaidda, aggenna ne siiquwaanne ne tumatettaa gishshau, taani ne sunttaa galatais; aissi giikko, neeni ne sunttaanne ne qaalaa ubbaappe aattada xoqqu oottadasa.

³ Taani xeesido gallassi taayyo koyadasa; ne minotettan tana minttadasa.

⁴ Abeet GODAU, sa7an de7iya kawoti ubbai nena galatona; aissi giikko, eti ne doonaappe kiyida qaalaa siyidosona.

⁵ GODAA bonchchoi gita gidiyo gishshau, eti GODAA ogiyaabaa yexxana.

⁶ GODAI bolla xoqqan de7ikkokka, hiyyeesata keha aifiyan xeellees. SHin otoranchchata i haahuwan erees.

⁷ Taani meto giddoora hemettikkokka, neeni tana saro ashshaasa. Ta morkketu hanqquwaa bolli ne kushiyaa miccaasa; ne ushachchan tana ashshaasa.

⁸ GODAI taassi giidi qoppidoogaa polana; abeet GODAU, aggenna ne siiqoi merinaagaa. Ne kushe oosuwaa yegga aggoppa.