Mazamure Maxaafaa 137 - Wolaytta Bible

¹ Baabiloone shaafatu lanqqen uttidi, nuuni Xiyoone qoppido wode yeekkida.

² He sohuwan nuuni nu diittaa mittaa bolli kaqqida.

³ Nuna omooddida asati nuuni yexxidi, eta ufaissana mala, “Xiyoone yettaappe issuwaa ane nuuyyo yexxite” yaagidosona.

⁴ GODAA yettaa nuuni allaga biittan waati yexxonii?

⁵ Yerusalaame katamau, taani nena balikko, ta ushachcha kushee ba oosuwaa balo.

⁶ Taani nena hassayennan aggikkonne ta ufaissa ubbaappe aattada Yerusalaame dosennan aggikko, ta inxxarssai kookkiyaara oiqetto.

⁷ Abeet GODAU, Yerusalaamee omoodettiyo gallassi Eedooma asati oottidobaa hassaya; eti, “Qolite! Qolite! Hirkki xaphuwaa gakkanaassi laalite!” yaagidoogaa baloppa.

⁸ Baabiloone biittau, neenikka bayana! Neeni nu bollan oottido palaa haluwaa ne bolli oottiyaagee anjjettidaagaa.

⁹ Ne guutta naata oiqqidi, zaallaa bolla shociyaagee anjjettidaagaa.