Mazamure Maxaafaa 132 - Wolaytta Bible

Pudettaa kiyiiddi yexxido yettaa

¹ Abeet GODAU, Daawitabaanne i danddayido metuwaa qoppa.

² GODAASSI i caaqqidoogaa, Yaaqooba Xoossaayyo, Wolqqaamaayyo i hagaadan yaagidi geppidoogaa hassaya;

³ “Hagaappe sinttan taani ta soo gelikke, woikko ta hiixan zin77ikke.

⁴ Taani ta aifiyaa qilimmikke, woikko xiskkikke.

⁵ Hegeenne, taani GODAASSI soho, Yaaqooba Xoossaayyo, Wolqqaamaayyo de7iyoosaa giigissana gakkanaashiina” yaagiis.

⁶ Hekko, nuuni Taabootaabaa Beetaliheemen siyida; Yi7aariima giyo kataman a nuuni demmida.

⁷ Nuuni, “Ane i de7iyoosaa boos; a gedee yedhdhiyoosan gufannidi, au goinnoos” yaagida.

⁸ Abeet GODAU, dendda! Ne minotettau malaata gidiya ne Taabootaara ne Beeta Maqidasiyaa gelada de7a.

⁹ Ne qeeseti xillotettaa maayona; ne asati ufaissau yexxona.

¹⁰ Ne ashkkaraa Daawita gishshau, neeni doorido kawuwaa yeggoppa.

¹¹ GODAI Daawitassi mulekka kaddenna caaquwaa hagaadan yaagidi caaqqiis; “Ne gulbbataappe yelettida ne naatuppe issuwaa taani kawoyana.

¹² Ne naati ta maachchaanne taani tamaarissiyo timirttiyaa naagikko, eta naatikka ne kawotaa araatan merinau uttana” yaagiis.

¹³ GODAI Xiyoone dooriis; baayyo de7iyoosa oottanaukka amottidi, hagaadan yaagiis;

¹⁴ “Hagee taayyo merinau de7iyo soho; taani amottido gishshau, hagan uttana.

¹⁵ Taani daro kattaa immada Xiyoone anjjana; an de7iya hiyyeesatakka qumaa kalssana.

¹⁶ An de7iya qeesetakka taani atotettaa maizzana; an de7iya Xoossaa asatikka ufaissau yexxana.

¹⁷ “Ha sohuwan Daawita zerettaappe issuwaa kawoyana; taani doorido kawuwaa kawotettaa gam77issana.

¹⁸ Taani a morkketa yeellaa maizzana; shin a huuphiyan de7iya kawotaa kallachchai phoolana” yaagiis.